Arben Pjeçi, nënkomisari i Policisë së Durrësit u vetëvra pasditen e sotme në zyrën e tij në komisariat.
Pjeçi, 57 vjeç, ishte pjesë e Policisë së Shtetit prej 35 vitesh, dhe ishte i angazhuar me Policinë Kriminale në qytetin bregdetar.
Nënkomisari i dha fund jetës në zyrën e tij, ndërsa më parë ishte përshëndetur me disa nga kolegët. Nga raportimet mësohet se Pjeçi ndodhej në zyrë, të cilën e kishte mbyllur nga brenda.
Raportohet se viktima është gjetur i pajetë, ndërsa pranë tij arma e shërbimit.
Ajo që duket se mbetet mister është fakti se asnjë nga punonjësit e policisë që ndodheshin në komisariat nuk kanë dëgjuar krismën e armës.
Pjeçi, baba i dy fëmijëve ishte dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, me punë në komunitet për plagosje të lehtë pas një sherri me një nga fqinjët e tij. Sipas raportimeve, sherri ka nisur mes dy grave fqinje, por që ka përfshirë edhe burrat.
Pjeçi e ka marrë aktin ekstrem në kushtet e një gjendjeje të rënduar psikologjike, që e kishte shfaqur ditët e fundit. Dhe duket se këtu ka ndikuar vendimi i gjykatës, që i mbyllte karrierën 35-vjeçare në Polici. Bazuar në vendimin e Gjykatës, Pjeçit i ishte komunikuar masa e pezullimit nga detyra, gjë që duket se nuk e kishte kapërdirë.
“Për këtë ngjarje është krijuar një grup i posaçëm hetimor, në drejtimin e Prokurorisë së Durrësit dhe oficerëve të Policisë Gjyqësore të Prokurorisë si dhe është njoftuar dhe Agjencia e Mbikëqyrjes Policore. Në lidhje me rrethanat dhe për sqarimin përfundimtar të motivit, do të kemi njoftim shterues në përfundim të veprimeve hetimore paraprake”, njoftoi policia.
Discussion about this post