Në mbrëmjen e 26 nëntorit Kosova u trondit nga vrasja e tre personave në Gllogjan të Deçanit. Autobusi që po qarkullonte nga Gjakova për në Gllogjan u sulmua me kallashnikov, ku mbeti i vdekur shoferi i autobusit dhe dy nxënës. Prokurorja tha se në drejtim të autobusit u zbraz pothuajse një karikator. Pas 15 ditësh, organet e rendit kanë prangosur tre persona të dyshuar për këtë rast dhe të njëjtit me vendim të prokurorit janë dërguar në paraburgim.
Kjo u bë e ditur ditën e shtunë me anë të një konference të jashtëzakonshme të organizuar nga Prokuroria Themelore e Pejës. Para mediave u paraqit kryeprokurori i Prokurorisë Themelore të Pejës, Agim Kurmehaj.
“Pas vrasjes kemi filluar hetimet me ndihmën e Prokurorisë së Shtetit. Pas punës intensive janë arrestuar tre persona me dyshimin se kishin kryer veprën penale të vrasjes së rëndë. Prokuroria i ka ndaluar për 48 orë”, ka thënë kryeprokurori Agim Kurtmehaj.
“Nuk mund të japim informata të tjera që do të mund ta dëmtonin procesin e hetimeve. Ne si Prokurori zotohemi se edhe pas arrestimit të tyre, do të vazhdojmë me intensitet të shtuar për ta ndriçuar këtë rast deri në fund. Për shkak të ndjeshmërisë së çështjes, nuk mund të marrim pyetje”, tha Kurtmehaj.
Sipas raportimeve tre të arrestuarit janë familjarë të një vajze nga Gllogjani që kishte bërë vetëvrasje në vitin 2020.
Sipas mediave kosovare, dyshohet se motivet e këtij sulmi lidhen me një rast të vetëvrasjes të një vajze nga Gllogjani. Sipas familjes së vajzës së vetëvrarë, arsyeja e kësaj vetëvrasje është shoferi i autobusit, Gani Gjokaj. Por këto raportime nuk janë konfirmuar ende nga organet e rendit.
Për vetëvrasjen e vajzës dhe studentes së shkëlqyer ishte shprehur i tronditur atë kohë kryetari i Deçanit, Bashkim Ramosaj.
Discussion about this post