Moti i keq, OSHEE: Dëmtohet shtylla e tensionit të lartë, 4 fshatra pa drita në Gjirokastër

Reshjet intensive të shiut që kanë pushtuar vendin, kanë shkaktuar probleme me furnizimin me energjinë elektrike në disa fshatra.

OSHEE njofton se situata në qarkun e Gjirokastrës, paraqitet kritike, pasi stuhia ka zhvendosur shtyllat e tensionit të lartë duke lënë pa energji fshatrat Zagori, Grapsh, Dropull i Poshtëm dhe Dropulli i Sipërm.

Sakaq, si rezultat i rritjes së nivelit të ujit në Nst Poçem është stakuar linja 35kV Ballsh-Poçem për efekt sigurie. Ndërkohë në Vlorë, si pasojë e prurjeve të lumit Vjosë janë dëmtuar shtylla dhe një kabinë, në fshatin Ganaj në Selenicë.

OSHEE bën me dije se në disa zona të vendit është detyruar të bëjë stakime për efekt sigurie, kur ka prezencë të ujit në kabina, ndërsa shton se të gjithë hidrovoret janë në punë.