Federata Shqiptare e Futbollit ka arritur marrëveshjen me trajnerin Bledi Shkëmbi për të marrë drejtimin e ekipit Kombëtar U-19.
Ish-futbollisti i Kombëtares i cili prej vitesh ka nisur karrierën si trajner do të zëvendësojë në këtë detyrë teknikun Ervin Bulku, i cili do të jetë pjesë e stafit teknik të trajnerit Silvinjo.
Bledi Shkëmbi është një emër i njohur në vendin tonë, teksa ka qenë një ndër futbollistët më të spikatur të brezit të tij. Ai gjithashtu numëron edhe 14 ndeshje me Kombëtaren A, ndërsa si trajner ka punuar në drejtimin e klubeve si Teuta dhe Dinamo në Shqipëri, apo dhe Lirisë e Ballkanit në Kosovë. Tani detyra e tij do të jetë të ndihmojë në rritjen e talenteve kuqezi.
Në një prononcim për fshf.org Drejtori Teknik i FSHF-së, Fulvio Pea, shpjegoi arsyet e këtij ndryshimi në ekipin Kombëtar U-19. Ai vlerësoi punën e bërë nga trajneri Ervin Bulku, i cili tashmë do të ketë një detyrë akoma më të rëndësishme, si pjesë e stafit teknik të Kombëtares A dhe më pas shtoi se postin e trajnerit në ekipin Kombëtar U-19 do ta marrë Bledi Shkëmbi.
“Përpara se të prezantojmë trajnerin e ri, dua të flas pak për atë që largohet nga ekipi Kombëtar U-19 sepse është promovuar në skuadrën A, pra bëhet zyrtarisht pjesë full-time e ekipit Kombëtar A, Ervin Bulku, që për ne ka qenë një bashkudhëtar i shkëlqyer sepse ka treguar vlera të jashtëzakonshme njerëzore. Kjo na bën shumë krenar sepse për këto cilësi ai u vlerësua edhe nga trajneri i ekipit tonë Kombëtar. Trajneri i ri i ekipit Kombëtar U- 19 është ish-lojtari i Kombëtares, Bledi Shkëmbi” – tha Drejtori Teknik i FSHF-së, Fulvio Pea.
Duke folur për fshf.org, Bledi Shkëmbi tha që të drejtojë ekipin Kombëtar U-19 është një ëndërr e bërë realitet.
“Të drejtosh një Kombëtare është një kënaqësi, është një ëndërr. Për të qenë i sinqertë e kam pasur gjithmonë ëndërr, ashtu siç e kanë lojtarët ashtu e kemi edhe ne trajnerët ëndërr të stërvisim ekipin Kombëtar pavarësisht moshës që është. Patjetër që dua të falenderoj Drejtorin Teknik i cili më bëri këtë ofertë dhe sinqerisht mu plotësua një ëndërr që shpresoj ta vazhdojë gjatë”, – u shpreh fillimisht trajneri Shkëmbi.
Më tej, ai vlerësoi ndryshimin e madh që ka pësuar FSHF dhe futbolli shqiptar, veçanërisht në infrastrukturë duke krahasur kohën kur ai ka përfaqësuar ekipin Kombëtar si futbollist.
“Përsa i përket pjesës së ndryshimit mendoj që është si nata me ditën, në çdo aspekt që nga mënyra e stërvitjes, nga mënyra se si punohet dhe nga ngritja e një administrate të madhe futbolli. Unë me të vërtetë kisha dëgjuar nga jashtë por tani nga brenda po e shikoj dhe ndjejë kënaqësi që jam në të njëjtën anije me këtë grup të madh e të suksesshëm, sepse po shikoj që Kombëtarja jonë po korr sukses edhe ne shpresojmë që futbolli i moshave të ndjek hapat e Kombëtares së madhe.” – theksoi ai.
Në fund të prononcimit, trajneri i ri i ekipit Kombëtar U-19, vlerësoi edhe projektin e ndërmarrë nga Drejtoria Teknike në FSHF, “Step by Step” i cili i jep mundësinë trajnerëve të ekipeve Kombëtare të moshave të punojnë çdo javë në ambientet e “Shtëpisë së Futbollit” me lojtarët vendas, të cilët janë pjesë e klubeve dhe akademive shqiptare.
“Jam i bindur që projekti “Step by Step” do të na ndihmojë shumë. Mendoj jo vetëm ne si staf duke parë nga afër pothuajse çdo javë futbollistët të cilët ne mendojmë t’i kemi në grupin kryesor. Por jam i bindur që edhe futbollistët do të kenë një shans për të na treguar dhe ajo që është më e rëndësishmja do të kenë një shans që këtë fanellë të bukur ta veshin gati çdo javë, të stërviten në një ambient të mirë, me kushte shumë të mira. Shpresoj dhe jam i bindur se të dyja palët do të kemi përmirësim.” – përfundoi Bledi Shkëmbi.
Discussion about this post