Plagosja me thikë e tre të rinjve në Vlorë, kapet një nga autorët

Njëri nga autorët e plagosjes së tre të rinjve në Vlorë ka rënë në prangat e policisë ndërsa tjetri është në kërkim.

Ngjarja ndodhi rreth orës 12:30, në lagjen “Isa Boletini”, ku pas një konflikti për motive të dobëta, u plagosën me thikë dy 18 vjeçarë dhe një 20 vjeçar.

Tre të rinjtë ndodhen në spital nën kujdesin e mjekëve. Në vijim të veprimeve procedurale, gjatë kontrollit në banesën e 18 vjeçarit të arrestuar, shërbimet e policisë gjetën dhe sekuestruan 1 pistoletë sportive, 2 përforcues grushti dhe 2 mjete prerëse (thika).

Njoftimi i policisë

Vlorë/Informacion paraprak

Plagosën me mjet prerës (thikë), 3 bashkëmoshtarët e tyre, falë ndërhyrjes së menjëhershme të Policisë, vihet në pranga njëri prej autorëve të dyshuar, punohet për kapjen e autorit tjetër të dyshuar.

Sekuestrohen 1 pistoletë sportive, 2 mjete prerëse (thika) dhe 2 përforcues grushti.

Rreth orës 12:30, në lagjen “Isa Boletini”, dyshohet se pas një konflikti për motive të dobëta, kanë mbetur të dëmtuar me mjet prerës (thikë), shtetasit Xhuliano Hodaj, 20 vjeç, Enea Tafili, 18 vjeç dhe H. N., 18 vjeç, të cilët ndodhen në spital, në kujdesin e mjekëve.

Shërbimet e Policisë kanë shkuar menjëherë në vendngjarje dhe falë veprimeve të shpejta, bënë të mundur kapjen e njërit prej autorëve të dyshuar, shtetasit H. M., 18 vjeç, dhe shoqërimin e tij, në Komisariatin e Vlorës, për veprime të mëtejshme procedurale.

Në vijim të veprimeve procedurale, gjatë kontrollit në banesën e shtetasit H. M., shërbimet e Policisë gjetën dhe sekuestruan 1 pistoletë sportive, 2 përforcues grushti dhe 2 mjete prerëse (thika).