Ndeshja me Laçin, Shehi: Janë të fortë, duhet të kemi përqendrim

Këtë të martë Tirana do të përballet me Laçin në orën 13:45 për javën e 13 të Superligës. Kjo konsiderohet si përballja më e fortë e këtij raundi.

Duke folur në konferencën për mediat në prag të ndeshjes me kurbinasit, trajneri Orges Shehi u shpreh se kjo përballje është shumë e vështirë, ndërsa theksoi se Xhixha do të mungojë në takimin me ish-skuadrën e tij.

“Ndeshje me shkallë vështirësie të lartë, Laçi ka ekip të mirë, ka lojtarë cilësorë dhe në javët e fundit ka bërë shumë mirë. Gjendja e skuadrës është e mirë, jemi stërvitur me përqendrim shumë të madh. Nuk kemi rikuperuar Xhixhën dhe Përgjonin, të tjerët janë të gatshëm. Nuk ndikohemi nga presioni, kundërshtarët kanë punën e tyre, por jemi të përqendruar vetëm te ajo që bëjmë ne. Në krahasim nga faza e parë, kemi bërë më mirë në 3 ndeshjet e para, kemi marrë 7 pikë. Laçi është një rival i joni sa i përket cilësisë së skuadrës. Është me e lehtë të luash përballë rivalëve direkte, pasi ata luajnë futbollin e tyre. Problem do të jetë vetëm nëse nuk japim çfarë kemi.”-theksoi ai.

Më tej tekniku shtoi se skuadra e tij nuk duhet të humbasë përqendrimin dhe në të njëjtën kohë sipas tij nuk duhet ta nënvlerësojnë Laçin, pasi tashmë është duke bërë shumë mirë.

“Kundërshtari ka pikë më shumë në krahasim me fillimin e fazës së parë. Është ndeshje e vështirë, për shkak të cilësisë, ndryshimit dhe pikëve që ata kanë marrë. Nuk mendoj se duhet të kemi vetëkënaqësi, na presin shumë ndeshje. Është e vështirë të krijosh diktatin, por ne kemi bërë mirë. Nuk duhet të humbim asnjëherë përqendrimin dhe vlerësimin për kundërshtarin”, përfundoi Orges Shehi./K.T/Gijotina.com