Në Këshillin e Lartë të Prokurorisë po zhvillohet seanca dëgjimore për procedimin disiplinor të kërkuar nga Inspektori i Lartë i Drejtësisë ndaj magjistratit Shkëlqim Kokona, i cili akuzohet për shkelje të rënda profesionale, prej të cilave kërkohet edhe shkarkimi i tij nga detyra.
Kjo vjen pasi më herët, Inspektorati i Lartë i Drejtësisë i kërkon Këshillit të Lartë të Prokurorisë, shkarkimin nga detyra të Prokurorit të Pogradecit Shkëlqim Kokona. Përmes një njoftimi publik, ILD tregon se, janë konfirmuar një sërë shkeljesh të kryera nga Prokurori Kokona, gjatë periudhës 2018-2021, ndër të cilat mund të përmendim refuzimin e dosjeve për të trajtuar, si dhe shtyrjen qëllimisht të seancave. Sipas ILD, këto shkelje kanë cenuar besimin e publikut tek institucionet e drejtësisë.
“Këto sjelljet e përsëritura të magjistratit përbëjnë rrethanë rënduese, në kushtet kur ndaj tij ishte marrë më parë një masë disiplinore “Vërejtje me paralajmërim për shkarkim nga detyra”, pikërisht për shkelje të kryera gjatë përfaqësimit në gjykim të një çështje penale dhe për komunikimin me drejtuesin në shkelje të rregullave mbi etikën dhe sjelljen e prokurorëve. Sjelljet e magjistratit kanë sjellë shkelje të rënda profesionale dhe diskretitim të pozitës dhe figurës së prokurorit, si dhe kanë cenuar besimin e publikut te drejtësia”, thuhet në njoftim. Ndërsa thekson se edhe më parë ndaj Kokonës është marrë masa disiplinore për tërheqje vëmendje për shkelje të rregullave në punë.
Discussion about this post