Opozita ka thirrur një protestë mbarëkombëtare pasditen e së martës, e cila do të zhvillohet në bulevardin “Dëshmorët e Kombit”. Asnjë prej deputetëve apo drejtuesve opozitarë nuk ka pranuar të bëjë publike skenarin e protestës, ndërsa sot autoritetet e sigurisë kanë marrë masa, sikundër shprehen për të parandaluar aktet ekstreme.
Fillimisht në bulevardin “Dëshmorët e Kombit” janë vendosur kamera me rezolucion të lartë për të monitoruar protestën, veçanërisht në zonën pranë Ministrisë së Brendshme, Kryeministrisë, godinës së Parlamentit dhe Presidencës, edhe pse protestuesit pritet të ndalen para godinës qeveritare. Kjo e fundit është blinduar, ndërsa dyert e saj janë veshur nga jashtë me llamarina për të parandaluar në këtë mënyrë ndoshta një skenar që mund të çonte në thyerjen apo dëmtimin e tyre.
Për protestën e opozitës pritet të angazhohen mbi 1000 forca të policisë dhe sigurisë, ndërsa në gadishmëri do të jenë edhe trupa të RENEA-s, Gardës, Repartit Shqiponja dhe FNSH, ndërkohë që agjentë të policisë mund të infiltrohen brenda turmës, një praktikë kjo e aplikuar edhe më parë në rastet e protestave opozitare.
Discussion about this post