Dalin para gjykatës katër të arrestuarit në protestën e opozitës

Katër protestues të arrestuar më 20 shkurt në protestën e opozitës para Kryeministrisë kanë dalë sot para gjykatës.

Katër protestuesit janë Kindi Toli, Andrea Malia, Bledar Kola, Ismet Stefanis.

Deputetët e Partisë Demokratike kanë shkuar të ndjekin nga afër seancën gjyqësore ndaj 4 protestuesve, të cilët, sipas tyre janë arrestuar në mënyrë të paligjshme nga policia pas protestës së 20 shkurtit.

Opozita ka denoncuar punonjësit e policisë, të cilët pa uniformë policie dhe pa numër identifikimi kanë bërë rrëmbimin e protestuesve dhe dhunimin barbar të tyre në ambientet e komisariatit.

Sipas policisë, 4 të rinjtë u arrestuan pas protestës së opozitës, pasi hodhën lëndë piroteknike (kapsolla, flakadanë, molotovë), në drejtim të punonjësve të Policisë dhe Kryeministrisë.