Të tjera detaje janë zbardhur nga ngjarja e rëndë e zbuluar mëngjesin e sotëm në Durrës, nga ku rezultoi se shtetasi Pëllumb Meta, i njoftuar si i humbur prej 10 ditësh nga familjarët e tij, është vrarë me armë zjarri nga vajza 19-vjeçare, Hygerta Meta. Kjo e fundit dyshohet se ka qëlluar për vdekje me armë zjarri babain e saj, më pas i ka groposur trupin në kasollen e bagëtive.
Policia dyshon se vajza nuk e ka kryer e vetme krimin, nisur nga përmasat fizike të saj. Policia ende nuk ka gjetur armën e krimit, sikundër hetuesit po punojnë për të zbuluar rolin e personave të tjerë që mund të kenë bashkëpunuar, përfshirë nënën dhe 2 vëllezërit e 19-vjeçares.
Makina e viktimës, referuar të dhënave nga grupi hetimor, u gjet e braktisur në Parkun Rinia në Durrës. Vajza ka deklaruar se makinën e babait e ka lëvizur vetë ajo, por nga hetimet paraprake rezulton se personi që e ka lëvizur automjetin është mashkull.
Sipas dëshmisë së vajzës në polici, ajo e kreu krimin e rëndë për shkak se babai ishte shumë autoritar dhe donte ta fejonte jashtë dëshirës së saj.
Vajza tha se ajo dëshironte të vazhdonte studimet e larta, ku ndodhej në vitin e parë për menaxhim biznes dhe jo të martohej.
Sipas dëshmisë së dhënë për oficerët e policisë gjyqësore, Hygerta Meta, pohon se do ta ribënte sërish veprimin, pasi babai i saj ishte dhunues dhe jo mirëkuptues ndaj dëshirave të jetës së saj.
“Jam e lumtur që e kreva unë këtë punë dhe nuk pendohem që kam vrarë tim atë. Ai na ka torturuar dhe i ka nxirë jetën nënës sime. Unë jam fëmija i vogël i familjes. Motra është më e madhja është e martuar, janë 2 vëllezërit dhe pastaj unë. Mami dhe ne nuk kemi folur kurrë në familje. Për gjithçka fliste dhe vendoste babai. Ai nuk na pyeste kurrë çfarë dëshironim. Kur mori vendimin për martesën time, aty erdhi fundi. Nuk dëgjoi çfarë unë doja. M’u mblodh një urrejtje për një kohë të gjatë. Ditën e ngjarjes nuk u konfliktuam fare. Mora armën që babi përdorte kur shkonte në punë si roje dhe e qëllova. Pas krimit e kam mbështjellë me një çarçaf pastaj me fasho e në fund me qese. Armën e hodha buzë detit”, ka pohuar ajo në deklarimin e saj.
Fqinjët e 50-vjeçarit të ndjerë deklarojnë se ai ishte një person shumë fanatik që dhe vajzën e parë e kishte martuar me mblesëri në Laç.
Sipas fqinjëve, 50-vjeçari kishte shumë vite që jetonte në Shën Vlash, por ai ndiqte traditat e zonës ku ishte rritur, atë të Krujës, ku vajzat e familjes nuk duhet të martohen me dashuri, por me mblesëri.
Ngjarja e rëndë ka ndodhur në fshatin Shënavlash të Durrësit, ku në oborrin e familjes Meta, është gjetur i vrarë me armë zjarri dhe i varrosur kryefamiljari Pëllumb Meta.
Në lidhje me këtë krim policia ka arrestuar vajzën e viktimës, 19-vjeçaren Hygerta Meta, studente në Tiranë për biznes, e cila sipas të dhënave paraprake policore mësohet se e ka pranuar autorësinë e vrasjes së të atit.
Discussion about this post