Dy viktima me armë zjarri në Korçë, ja ç’thotë Policia (Emrat)

Policia e Korçës ka dhënë detajet e para lidhur me ngjarjen e rëndë që ndodhi mbrëmjen e sotme, ku dy persona mbetën të vrarë me armë zjarri.

Sipas Policisë, Ilia Lluka ka qëlluar me armë zjarri ndaj 40-vjeçarit Emiljano Pine, i cili humbi jetën gjatë transportit në spital. Më pas autori i dyshuar i krimit, pasi ka qëlluar 40-vjeçarin, dyshohet se është vetëvrarë me armën e krimit.

Korçë/Informacion paraprak

Më datë 28.02.2024, rreth orës 20:25, në lagjen nr. 18, Korçë, rruga “Koço Golniku”, Ilia Lluka, dyshohet se ka qëlluar me armë zjarri Emiljano Pine, rreth 40 vjeç, banues në Korçë, i cili ka humbur jetën gjatë transportimit për në spitalin e Korçës.

Autori i dyshuar i krimit, pasi ka qëlluar 40-vjeçarin, dyshohet se është vetëvrarë me armën e krimit.

Shërbimet e Policisë kanë shkuar menjëherë në vendngjarje, ku kanë gjetur dhe sekuestruar në cilësinë e provës armën e krimit, gëzhojat. Gjithashtu janë administruar dhe po këqyren pamjet filmike nga kamerat e sigurisë.

Për këtë rast është krijuar një grup i posaçëm hetimor i cili po punon për zbardhjen dhe dokumentimin e plotë të ngjarjes, si dhe për identifikimin e autorit të ngjarjes”, tha policia e Korçës.