Deri më tani, Omicron konsiderohet një variant i çuditshëm i koronavirusit i cili shkakton sëmundjen Covid. Ndonëse me shumë mutacione, Omicron nuk ka rrjedhur nga asnjë variant tjetër si Alfa, Beta, Delta, por nga koronavirusi që qarkullonte ndoshta 18 muaj më parë. Pra, pse nuk është vënë re gjithë këto kohë? Pse po përhapet tani?
Studiuesit po eksplorojnë një numër arsyesh. Një alternativë është se Omicron u shfaq në një rajon të largët të Afrikës, por nuk u përhap deri më tani. Një tjetër është se ai evoluoi te kafshët e infektuara, si minjtë, dhe më pas kaloi përsëri te njerëzit. Por një shpjegim i tretë po fiton terren teksa më shumë të dhëna po dalin në dritë: Omicron u shfaq te një person me një sistem imunitar të dobët, si për shembull dikush që trajtohet me kancer, ndoshta një pacient me organe të transplantuara ose dikush me HIV të pakontrolluar.
Mundësia e fundit ka ngjallur shqetësim global. Afrika Sub-Sahariane është vendi i dy të tretave të popullsisë globale që jeton me HIV. Për një sërë arsyesh, duke filluar nga mungesa e aksesit në klinika deri te frika nga paragjykimet dhe kujdesi shëndetësor i ndërprerë, 8 milionë njerëz në rajon nuk janë në terapi për HIV.
Shënim: SIDA është një sindromë, ose një varg simptomash, që mund të zhvillohet me kohë tek një person me HIV që nuk merr trajtim. Një person mund të ketë HIV pa zhvilluar SIDA, por nuk është e mundur të ketë SIDA pa pasur më parë HIV.
Pra, ekziston rreziku se virusi HIV i pakontrolluar po nxit shfaqjen e varianteve të Covid.
Dyshimi se variantet shqetësuese mund të zhvillohen te pacientët me sistem imunitar të dobët nuk është i ri. Variantet Alfa dhe Beta, të zbuluara për herë të parë vitin e kaluar në Mbretërinë e Bashkuar dhe Afrikën e Jugut, mendohet gjerësisht se janë shfaqur pas infeksioneve afatgjata te pacientët.
Mekanizmi u parashtrua nga Charles Darwin më shumë se 150 vjet më parë: evolucioni përmes seleksionimit natyror. Nëse një person është i infektuar me Covid, por ka një përgjigje imune të dobët, infeksioni mund të vazhdojë për muaj të tërë. Në këtë kohë, antitrupat neutralizojnë disa nga viruset, por jo të gjitha variantet. Viruset që mbijetojnë shumohen, ndryshojnë dhe – potencialisht shmangin mbrojtjen imune.
Burimet: Guardian, Bloomberg
Discussion about this post