Qindra fermerë u përleshën me policinë në qytetin spanjoll të Zaragoza teksa u përpoqën të futeshin në Pallatin La Aljafería, ku po zhvillohej një mbledhje e qeverisë.
Sindikata e policisë lokale denoncoi dhunën, duke thënë se tre policë u plagosën. Pasi policia u përgjigj duke goditur protestuesit me shkopinj, një protestues u dërgua me urgjencë në spital.
Protesta u organizua përmes rrjeteve sociale dhe nuk kishte lidhje me sindikatat që kanë bërë thirrje për greva të vazhdueshme mbarëkombëtare.
Protestat kanë vazhduar në Spanjë gjatë muajit të kaluar. Këtë javë, fermerët bllokuan gjithashtu rrugën kryesore AP-7 që lidh Francën dhe Spanjën në Kataloni.
Në Kataloni, ku disa rrugë u bllokuan për ditë të tëra, qeveria ra dakord të riorganizojë Ministrinë e Veprimit për Klimën dhe të studiojë ndryshimin e emrit të saj në Ministrinë e Veprimit Klimatik, Bujqësisë, Blegtorisë dhe Peshkimit.
Ndryshe, qeveria spanjolle dhe sindikatat do të ndërpresin negociatat për rreth një javë për të reflektuar mbi kërkesat dhe kompromiset e tyre.
Discussion about this post