Vendi vazhdon të vuaj pasoja që la moti i keq gjatë javës së shkuar. Në Vlorë dhe Fier uji po tërhiqet por dhjetëra hektarë toke dhe shumë shtëpi vazhdojnë të jenë të përmbytura. Ndërsa rrugët janë pothuajse të pakalueshme nga balta që është krijuar nga tërheqja e ujit. Ndërsa në zonat veriore si Dibër dhe Shkodër, regjistrohen temperatura tepër të ulta dhe reshje dëbore. Çka bën që situata në këto zona të jetë në gjendje të keqe dhe me mungesë të energjisë elektrike.
Sakaq, bëhet me dije se prej dy ditësh kanë pushuar reshjet e dëborës në Dibër, por gjendja është rënduar edhe më shumë për shkak të ngricave. Rënia e ndjeshme e temperaturave ka bërë që në rrugë të ketë prezencë të madhe të akullit dhe bënë të pamundur kalimin nga automjetet, por edhe këmbësorët.
Mësohet se, era e fortë në Qafën e Buallit po pengon qarkullimin normal të automjeteve pasi herë pas here bllokon rrugën me borë. Situatë e rënduar është edhe në fshatrat e Zerqanit, Ostrenit, Gjoricës, Trebishtit e Martaneshit. Edhe në këto zona ka prezencë të madhe të akullit në rrugë si dhe mungesë të energjisë elektrike.
Edhe fshatrat e Dibrës janë paralizuar nga ngricat të cilat janë shfaqur që prej pasdites së të hënës. Selishta, Lura e Reçi, janë pothuajse pa komunikim me qytetin e Peshkopisë si pasojë e borës dhe ngricave. Edhe situata me furnizimin me energji elektrike vijon të mbetet problem pasi me gjithë punën e bërë nga grupet e OSHEE, ende nuk është rikthyer rryma për qindra banorë të zonave rurale.
Discussion about this post