“Ishte një gjyq parodi”, u shpreh kryetari i zgjedhur i Himarës, Fredi Beleri, në deklaratën e tij të parë pasi u dënua me dy vjet burg nga GJKKO, duke vënë në dukje se “krimi i tij është se himariotët e zgjodhën Kryebashkiak.
Beleri shprehet se me një dosje të rreme penale, pa prova, pa dëshmitarë të tjerë përveç atij që paguhej nga policia, me një gjykatës “të emëruar”, në një kafaz xhami pa komunikim me avokatin e tij, sot gjykata e dënoi me dy vjet burg.
“Krimi që kam kryer është se ne, himariotët, kërkojmë të jemi zotër të tokave tona stërgjyshore. Krimi im është se qytetarët e Himarës më zgjodhën Kryetar Bashkie kundër planeve të kryeministrit Edi Rama.
Bashkimi Evropian dhe SHBA, a është kjo Drejtësia që ju dëshironi për ne?
Do të vazhdoj luftën time për Drejtësi dhe Demokraci në emër të bashkëqytetarëve të mi. Herët a vonë, do të gjej drejtësi. Kam aq durim sa duhet për të arritur deri në fund të këtij rasti”, u shpreh Beleri.
GJKKO shpalli fajtor kryetarin e zgjedhur të Himarës, Fredi Beleri dhe bashkëpunëtorin e tij Pandeli Kokaveshi. Gjykata dha një dënim me dy vjet burg për Fredie Belerin dhe 3 vjet shërbim prove për Kokaveshin.
Avokatët e tyre pritet të apelojnë kundër vendimit të gjykatës shqiptare. Një vendim që ishte paracaktuar sipas banorëve të Himarës me qëllimin e vetëm për të mos e lejuar Belerin të betohej si kryebashkiak.
“Lufta jonë do të vazhdojë, hapi tjetër është të apelojmë vendimin e gjykatës,” tha Leonardo Beleri, vëllai i kryebashkiakut të zgjedhur të Himarës.
Discussion about this post