17 fshatra në qarkun e Korçës vazhdojnë të mbeten në terr, pasi prej disa ditësh janë dëmtuar linjat e energjisë elektrike. Disa ditë më parë kishin këtë problem 35 fshatra, në disa prej tyre janë rregulluar problemet, ndërsa për këto 17 fshatra OSHEE raporton se është e vështirë ndërhyrja për riparime.
Pa energji në njësinë Gore është Babjen, Marjan, Mjaltas, Velcan, Selce, Senishte, Dolan, Tresove dhe Strelce. Ndërkohë në Moglice ende pa energji elektrike janë fshatrat Osoje, Gjinikas, Kodras, Protopape, Peshtan dhe Gopesh. Grupet e punës të OSHEE prej ditësh janë në terren për të riparuar difektet në shtyllat e tensionit të mesëm të cilat janë rrëzuar nga era e fortë dhe pesha e borës. Por të shumta janë edhe linjat e tensionit të ulët të cilat janë këputur në këto fshatra, falë edhe amortizimit të tyre ndër vite.
Terreni i thyer malor e bën edhe më të vështirë riparimin e difekteve. Burime pranë dy njësive administrative bëjnë të ditur se brenda dy ditësh pritet që të gjitha fshatrat të furnizohen me energji elektrike.
Discussion about this post