Kryebashkiakja e Durrësit, Emiriana Sako, ka lënë pa karburant prej disa muajsh makinat e shërbimeve, për shkak se të zvarritjes dhe korrupsionit me tenderin. Pak javë më parë Gijotina.com denoncoi se si Sako lë pa naftë makinat e pastrimit, kaldajat e shkollave dhe zjarrfikëset për shkak se dy tenderët me vlerë 2 milionë euro përmbanin shumë shkelje dhe ishin anuluar më shumë se dy herë.
Anulimi ishte bërë për shkak se kishte “gabime” në dokumentacion, ndërsa bëhej fjalë për një furnizim kaq të rëndësishëm. Më në fund, Sako ka rikthyer dy tenderët dhe ka shpallur fituesin.
Në këto raste ligji kërkon që të rishikohen dokumentet, të rregullohen kriteret sipas bazave ligjore dhe më pas të hapej sërish një tjetër garë. Sako nuk ka vepruar kështu ajo ka vazhduar me të njëjtat procedura dhe kontratat i ka firmosur një “rishpallje tenderi me fitues”.
Shohim se për tenderin me objekt ‘ Loti 1 Blerje Diesel 10 ppm ULSD’ ka paraqitur ofertë vetëm firma ‘Kastrati’ me vlerë 1.7 milionë euro, pra sa 100% e fondit limit. Pavarësisht se gara për këtë tender u hap shumë më herët dhe u anulua dy herë, fakti që fondi limit nuk ndryshoi, tregon qartë që ka qenë prokurim i porositur në interes të oligarkut naftës.
Duke shtuar edhe këtu faktin që kjo kontratë iu dhurua, dalim në rezultatin se Sako nuk ka menduar gjatë për shërbime që ka si detyrim ndaj qytetarëve, por si t’i xhirojë këto 1.7 milionë euro. Tashmë mund ta ndalë vetëm KPP, Autoriteti i Konkurrencës apo institucione të tjera përgjegjëse zgjohen dhe reagojnë në kohë.
Skema që përsëritet
Me të njëjtën skemë kryetarja Sako ka vepruar edhe me lotin tjetër që ka si objekt “Blerje Benzine Premium Unl 10 ppm”. Edhe në këtë rast më parë tenderi ishte anuluar dy herë për parregullsi, ndërsa Sako ftoi në tryezë vetëm firmën ‘Kastrati Shpk’.
Oferta e tij ishte sa fondi limit, 30 milionë lekë. Pa e zgjatur shumë, Sako e firmosi kontratën me Çetin, përmes drejtorit të saj në Ndërmarrjen Komunale Plazh.
Për këto miliona euro valëviten dy “flamuj të kuq”, sipas vlerësimit të riskut të korrupsionit nga Open Data. Marrja e tenderave pa garë nga Kastrati është fenomen kombëtar, pasi kjo kompani bën furnizimin me naftë të shumicës dërrmuese të institucioneve dhe bashkive.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post