Kosova bën hapin e parë drejt anëtarësimit në Këshillin e Evropës

Komisioni për politikë dhe demokraci i Asamblesë Parlamentare të Këshillit të Evropës miratoi këtë të mërkurën raportin për Kosovën, duke i hapur rrugë hapave të ardhshëm drejt anëtarësimit në këtë Këshill.

Me 31 vota pro, katër kundër dhe një abstenim, komisioni rekomandoi që Kosova të ftohet për t’u bërë anëtare e Këshillit të Evropës.

The @PACE_Political Affairs Committee, meeting in Paris, has recommended that Kosovo* be invited to become a member of the @CoE. More details on the PACE site soon…

Next step: a plenary debate – due on 18th April – and a vote by the full Assembly on its statutory Opinion.

— PACE (@PACE_News) March 27, 2024

Ndërkohë çështja kalon te Asambleja parlamentare e cila gjatë muajit prill duhet të votojë për pranimin e Kosovës, ndërsa votimi përfundimtar pritet në muajin maj, në Këshillin e Ministrave të këtij mekanizmi.

Zëvendësministri i Punëve të Jashtme, Kreshnik Ahmeti, shkroi në rrjetet sociale se “të gjitha propozimet që të vendosen parakushte të reja janë refuzuar nga shumica e anëtarëve të Komitetit, gjë që tregon se Kosova duhet të bëhet anëtare në maj të këtij viti dhe parakushtet e reja do të ishin të padrejta”.

Kosova aplikoi për anëtarësim në Këshillin e Evropës në prill të vitit 2022.

Por zbatimi i vendimit me të cilin manastirit të Deçanit, i njihet e drejta e pronës në mbi rreth 24 hektarë tokë nga ana e qeverisë së Kosovës dy javë më parë, ishte kushti kryesorë për hapjen e rrugës për anëtarësim në Këshillin e Evropës.

Çfarë është Këshilli i Evropës?

Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, e themeluar në vitin 1949.

Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës.

Është themeluar më 1949.

Këshilli mbron lirinë e shprehjes dhe të mediave, barazinë dhe minoritetet në vendet anëtare.

Kjo organizatë ka realizuar edhe fushata për mbrojtje të fëmijëve, kundër gjuhës së urrejtjes si dhe për të drejtat e romëve, të cilët përbëjnë komunitetin më të madh në Evropë.

Këshilli i Evropës u ndihmon vendeve anëtare që të luftojnë korrupsionin dhe terrorizmin si dhe që të kryejnë reformat e duhura gjyqësore.

Grupi i saj i ekspertëve për kushtetutë, i njohur si Komisioni i Venecias, ofron këshilla ligjore për shtete të ndryshme në botë.

Duke qenë organizatë ndërkombëtare, Këshilli i Evropës nuk mund të bëjë ligje, mirëpo ka aftësi të nxisë zbatimin e marrëveshjeve ndërkombëtare, të arritura nga vendet anëtare për tema të ndryshme.

Dy trupat kyçë të Këshillit janë: Komiteti i Ministrave dhe Asambleja Parlamentare.

Anëtarësimi do ta ndihmonte Kosovën, mes tjerash, në fushën e sundimit të ligjit, dhe luftën ndaj korrupsionit.