Kreu i PD, Lulzim Basha ka inkurajuar sërish institucionet e drejtësisë për të hetuar politikanë të niveleve të larta në luftën ndaj korrupsionit.
Kryedemokrati tha para mediave, se gjyqtarë e prokurorë ndodhen në presion për të mos vepruar, dhe shtoi se PD do të jetë krah tyre për të denoncuar këto raste.
“Dua ta them se megjithëse dje ka qenë ditë e ngarkuar, nga monitorimet e medias nuk ka munguar deklaratat tona. Duket qartë se presioni vazhdon për të minimizuar vjedhjen e këtyre viteve, në dritë të diellit, ku përfshihen llogari bankare jashtë shtetit, për të fshehur para dhe përfitues. Inkurajoj prokurorët, dje isha dhe jam kritik për vonesën e madhe, por sot është rasti të them diçka tjetër. Këta hetues ndodhen në presion për të mos vepruar. Dua t’ju them që PD-në e kanë në krah për të luftuar korrupsionin e politikanëve të lartë. Për të kaluar edhe njëherë në thelbin se çdo të thotë kjo për xhepat e shqiptarëve, si janë grabitur këto para, si është hequr buka nga goja e fëmijëve shqiptarë. Uroj që Gugallja të jetë në kërkim, të mos ia kenë mbyllur gojën përgjithmonë, si Gugallja. Nuk do të ndalemi së denoncuari këto raste”, tha Basha.
Discussion about this post