Komisioni Hetimor për sistemin TIMS ka caktuar 4 ekspertët që do asistojnë punën e komisionit.
Dy ekspertë janë propozuar nga mazhoranca, Dritan Jahaj dhe Vjosa Bodo Mujo. Ndërkohë dy ekspertët e tjerë janë propozuar nga PD, Kreshnik Myftari dhe Henri Bici.
Mbledhja e sotme e komisionit hetimor u shoqërua me tensione. Sali Berisha është futur në listën e dëshmitarëve referuar planit paraprak të hetimit, dhe kjo ngjalli debate mes opozitës dhe mazhorancës.
Toni Gogu tha me ironi se kolegët e opozitës po përpiqen të bëjnë gjyqin e Berishës dhe ta shpallin ta pafajshëm, ndërsa shtoi se kjo nuk është objekt i komisionit.
Nga ana tjetër, kryetari Ervin Salianji i tha se ishte deputetja e PS Blerina Gjylameti që kërkoi në mbledhjen e parë që të thërritet si dëshmitar Berisha, Basha e Bardhi. Vetë deputetja socialiste Gjylameti pretendoi se kishte bërë ironi dhe nuk ka kërkuar diçka të tillë.
Përpos Berishës, listës së dëshmitarëve i është shtuar edhe Lulzim Basha e Gazment Bardhi.
Mbledhja e radhës e Komisionit Hetimor për Sistemin TIMS është caktuar që të zhvillohet të premten e 12 Prillit në orën 12:00.
Discussion about this post