Kërkuan lirinë, gjykata lë në arrest shtëpie Berishën dhe Malltezin

Gjykata e Posaçme kundër Korrupsionit dhe Krimit të Organizuar ka rrëzuar kërkesën e Sali Berishës dhe dhëndrit të tij Jamarbër Malltezi, për revokim të masës së sigurisë.

Këta të fundit kishin kërkuar heqjen e masës së sigurisë arrest shtëpie, kërkesë që nuk u pranua nga gjykata.

Avokati i Berishës, Genc Gjokutaj, deklaroi për gazetarët pas seancës se ish-Kryeministri dhe Jamarbër Malltezi nuk mund të mbahen në arrest shtëpie për sa kohë nuk ka fakte dhe prova të reja nga hetuesit, e për këtë arsye duhet të ketë zbutje të masës së sigurisë.

Ish-kryeministri Berisha dhe Jamarbër Malltezi janë me masë sigurie arrest në shtëpi për akuzat korrupsion dhe pastrim parash në lidhje me hetimet për privatizimin e ish-kompleksit Partizanit.

Akuza që i cilësojnë të paqena dhe të fabrikuara nga kryeministri Edi Rama, që sipas tyre, po përdor Prokurorinë e Posaçme dhe gjykatën për ti goditur politikisht.

Më herët, gjykatat kanë refuzuar edhe kërkesën e Berishës për të marrë pjesë në seancat plenare dhe atë të Malltezit për heqjen e sekuestros preventive ndaj 25 pasurive të sekuestrua në kuadër të hetimit.