Kreu i grupit parlamentar të Partisë Demokratike Gazment Bardhi, në një deklaratë për mediet, i bëri apel mazhorancës të votojë të enjten në Kuvend për dërgimin e përputhshmërisë së mandatit të deputetes Olta Xhaçka në Gjykatën Kushtetuese, pasi votimi kundër, sipas tij, do të ishte krim në flagrancë.
Bardhi tha se Partia Socialiste nuk po zbaton vendimin e Gjykatës Kushtetuese.
“I bëj apel cilido që ka mbështetur zbatimin e reformës në drejtësi që të reagojë sot sepse nëse praktika e moszbatimit të sipas dëshirës së vendimeve të drejtësisë do të ishte një praktikë e rrezikshme që do të hidhte në erë parimet që udhëheqin një shtet ligjor. Do të ishte një precedent i rrezikshëm, mazhoranca të reflektojë të tërhiqet nga porosia që i ka dhënë deputetëve për të mos zbatuar vendimin e Gjykatës Kushtetuese dhe të dorëzojë para drejtësisë Olta Xhaçkën dhe më pas të gjithë zyrtaret me në krye Edi Ramën”, u shpreh Bardhi.
“Nëse këtu ka drejtësi dhe prokurori, cilido deputet që ngre kartonin për të refuzuar zbatimin e vendimit të Gjykatës Kushtetuese kryen krim në flagrancë”, tha Bardhi.
“Ligji për Gjykata Kushtetuese thotë se pengimi për të zbatuar vendimet dënohet sipas kodit penal. Cilido që pengon zbatimin e vendimit kryen krim. Është detyrë e drejtësisë të na provojë që nuk ka krim që kryhet në sytë e opinionit publik që mbetet i pandëshkuar”, tha ai.
Bardhi u ndal edhe tek situata brenda Partisë Demokratike, duke akuzuar Bashën se po bën opozitën e opozitës.
“Ata janë opozitë e opozitës. Shqipëria ka parë modele të tilla në 33 vite. Vendimi ynë është që kushdo që bën opozitën e opozitës ka vendosur të flasin me veten. Ne i kemi lënë të flasin me veten dhe do vazhdojnë të flasin me veten. Opozita nuk ka asgjë në dorë që të ushtrojë presion mbi institucionet e drejtësisë, nuk kemi pushtet e nuk kontrollojmë institucionet shtetërore, të vetmit që kanë mekanizma ndaj institucioneve të drejtësisë është pushteti, është kryeministri. Vetëm një njeri i pushtetshëm mund të ushtrojë presion mbi institucionet e drejtësisë”, tha Basha.
“Këto bashkëbisedimet me veten i kam lënë t’i zhvillojë në mënyrë permanente. Ne kemi një përgjegjësi në raport me qytetarët për të bërë opozitën e vendit, pastaj këtë opozitën e opozitës Shqipëria ka parë modele të tilla”, tha Bardhi.
I ndalur te Drejtësia, ai u shpreh se është shumica ajo që kontrollon institucionet e drejtësisë, ndërsa opozita nuk ka instrumente të tillë. “Nuk kontrollojmë as institucione shtetërore. Të vetmit që kanë mekanizma presioni ndaj drejtësisë është pushteti dhe kryeministri. Vetëm një njeri i pushtetshëm mund t’i ushtrojë presion drejtësisë”, tha Bardhi.
Discussion about this post