Mandati i deputetes, Olta Xhaçka do të diskutohet këtë të enjte në parlament.
Kërkesa për ta çuar mandatin në Gjykatë Kushtetuese, është futur në axhendë, dhe vjen pas një raporti të hartuar nga opozita, e cila thotë se mandati i Xhaçkës është i papajtueshëm dhe duhet të shqyrtohet nga Gjykata Kushtetuese.
Sipas opozitës, ish-Ministrja e Jashtme nuk mund të vazhdojë të jetë deputete, pasi është në konflikt interesi me shpalljen nga qeveria të bashkëshortit të saj Artan Gaçi investitor strategjik. Në raport, thuhet se ky i fundit, përmes shoqërisë “AG.TCC”, ka përfituar nga pasuritë e shtetit.
Pas ankimit në janarin e një viti më parë “Kushtetuesja” ia njohu këtë të drejtë opozitës dhe kërkoi që mandati i Olta Xhaçkës të shqyrtohet nga kjo gjykatë pasi të votohet në parlament.
Më shumë se një vit nga ky vendim i “Kushtetueses” që detyron Kuvendin të miratojë kërkesën e opozitës do të përcaktohet këtë të enjte nëse fati i mandatit të Xhaçkës do të shqyrtohet ose jo në themel nga Gjykata Kushtetuese.
Ndërkohë, në rendin e diskutimeve, në seancë do të shqyrtohen edhe disa projekvendime, mes të cilave edhe pagat në Kolegjin e Apelimit dhe Komisionit të Pavarur të Kualifikimit.
Discussion about this post