Partia Demokratike ka publikuar videon me një pjesë nga deklarata e kryedemokratit, Lulzim Basha, i cili thotë se PD është e vendosur të ecë përpara drejt të ardhmes që shqiptarët duan dhe meritojnë.
Basha thotë se lufta kundër korrupsionit, njësoj si dekriminalizimi i politikës është jetike për Shqipërinë. Ai thotë se mbështet drejtësinë për të luftuar korrupsionin.
“Sot dua t’ju drejtohem të gjithë qytetarëve shqiptarë me katër mesazhe. Lufta kundër korrupsionit njësoj si dekriminalizimi i politikës është jetike për Shqipërinë. Shqiptarët nuk janë të varfër, por janë të vjedhur. Shqipëria nuk është e varfër, por është e vjedhur. Ndaj për Partinë Demokratike dhe për mua si kryetar i saj, misioni numër një është lufta kundër korrupsionit dhe kundër krimit.
Përshëndes dhe mbështes drejtësinë në të gjitha veprimet kundër këtij armiku të mirëqenies së shqiptarëve. Partia Demokratike e mbështet pa kushte drejtësinë në luftën kundër këtij armiku të çdo shqiptari, që është korrupsioni” – thotë Basha.
Më tej ai thekson se edhe ish-qeverisja e Partisë Demokratike ka pasur korrupsion, por thekson se janë te vendosur për ta luftuar dhe për ta lënë pas të shkuarën.
“Edhe ish-qeverisja e Partisë Demokratike ka pasur korrupsion. Jemi të vendosur ta luftojmë edhe atë për të ecur drejt të ardhmes që meritojnë dhe duan shqiptarët. Nuk mund të ketë ndryshim për shqiptarët pa pasur një luftë pa kompromis dhe pa ngjyra politike kundër korrupsionit në nivele të larta.
Ne jemi të vendosur të ecim përpara, të shkëputemi nga pjesa e keqe e të kaluarës tonë dhe të zgjedhim të ardhmen” – thuhet në deklaratën e Bashës.
Discussion about this post