Për të katërtën herë radhazi, socialistët bojkotojnë komisionin për koncesionet në Shëndetësi

Ka dështuar për herë të katërt radhazi mbledhja e Komisionit Hetimor të Shëndetësisë.

Shkak është bërë sërish bojkoti i mbledhjes nga anëtarët e mazhorancës në këtë komision.

Debati për caktimin e mbledhjes duket se është pika që i ndan të dy palët. Albana Vokshi thotë se është kryetarja që cakton se kur do mblidhen, nga ana tjetër nënkryetari socialist Plarent Ndreca thotë se vendimmarrja i takon komisionit dhe se Vokshi ka refuzuar që të diskutojë mbi pikën e fundit të rendit të ditës për caktimin e mbledhjes.

Në një deklaratë për mediat këtë të premte, opozita hodhi akuza ndaj mazhorancës se këto janë skenarë me qëllim zvarritjen e hetimeve të komisionit për dy koncesionet, sterilizimin dhe check up-in.

“Gjithë kjo zvarritje është me tendencë që 4 muaj ikin shpejt dhe të bëjnë ç’të jetë mundur që ne mos të zbardhim informacion në kohë, të vonohet thirrja e dëshmitarëve, të vonohet mbledhja e provave të reja”, u shpreh Ina Zhupa.

“Këtyre u ka hyrë uji nga SPAK, nuk kanë interes ta vazhdojnë, prandaj gjysma kanë ardhur në konflikt interesi. Pa pikë turpi, çohet në 11 nga gjumi ka parë ndonjë ëndërr dhe tha nuk e kemi miratuar, ndërkohë që aty ishim gjithë”, deklaroi Saimir Korreshi.

Kryetarja Albana Vokshi tha se mungesa e deputetëve të mazhorancës përbën shkelje të detyrës nga ana e ligjvënësve socialistë. “Çdo ditë që kalon, ngushton kohën e hetimit parlamentar”, tha ajo.