Reshjet përmbytin rrugët e Tiranës, qytetarët detyrohen të kacavirren mureve

Moti i keq me rrebeshe paraditen e kësaj të mërkure, ka shkaktuar përmbytje në rrugët e Tiranës.

Një foto e publikuar nga media, nga zona e “Kopshtit Zoologjik” tregohet gjendja me të cilën janë përballur qytetarët në kryeqytet.

Në foto shihet se si një vajzë, në pamundësi për të kaluar rrugën e cila është mbushur me ujë, ka hipur në kangjellat e murit rrethues të kopshtit zoologjik për të kaluar rrugën.

Ajo kacavirret me një qese në dorë, anash murit për të kaluar atë pellg me ujë.

Rrugët e Tiranës përmbyten rëndon thuajse sa herë ka reshje shiu. Pavarësisht propagandës së kryebashkiakut Erion Veliaj, situata në terren vijon problematike prej vitesh tashmë.