Oligarku Paulin Gega ia gjen anën edhe Flamur Golemit. Me tenderin e fundit të bashkisë Gjirokastër, kompania e tij ka marrë të drejtën e furnizimit me naftë, benzinë dhe lëndë djegëse. Nuk dihet se me çfarë çmimi po e blen Golemi karburantin, por oferta përcakton vetëm fitimin e Gegës, 19 lekë për litër. Të gjitha transaksionet do të njoftohen me e-mail dhe furnizimi do të zgjasë deri në 31 dhjetor 2024.
Tenderi me “Flamur të kuq”
Më konkretisht, tenderi ka për objekt Loti 1 Nafte benzine, për të cilin do të shpenzohen 227 milionë lekë.
Sikur këtë tender ta organizonte vetë Gega, nuk do të shkonte më mirë se kaq. Menjëherë bie në sy se Open Data Albania i ka vënë tenderit “Red Flag”, për shkak të riskut të lartë të korrupsionit. Kështu, kontrata është dhuruar në mungesë të konkurrencës. Në këtë tender kanë marrë pjesë dy operatorë. Njëri është Hajrulla Xhihani PF, i cili ka një rol fiktiv, pasi ka paraqitur ofertë me zero lekë.
Ndërsa oferta tjetër është paraqitur nga “GEGA CENTER GKG” SHPK që ka marrë pjesë si bashkim operatorësh me subjektin tjetër “ANEL & CO”, në pronësi të Aleksandër Rogos. “GEGA CENTER GKG” SHPK zyrtarisht është në pronësi të Donike Gegës, bashkëshortes së Paulin Gegës.
Gega ka fituar me ofertën 22,715,896 lekë të reja (pa TVSH) ose gati 270 milionë lekë përfshirë TVSH. Rezulton se fituesit kanë ofruar një shifër 100% të njëjtë me fondin limit. Dhe këto të dhëna tregojnë qartë se tenderi është hartuar sipas kërkesave të Gegës!
Blihet lëndë djegëse për kaldajat e prishura
Ndërkaq, ajo që bie në sy është se një pjesë e karburantit do të blihet për kaldajat e disa shkollave në Gjirokastër dhe kopshteve. Në fakt, bashkia duhej të shpallte një tender për riparimin e kaldajave, pastaj të mendonte për lëndën djegëse që do të përdoret dimrin e ardhshëm.
Kështu, vazhdimisht ka pasur probleme në shkollën “Urani Rumbo” në qytetin e Gjirokastrës, madje deri në ultimatume për bojkot mësimor. Po ashtu edhe në shkollën “Koto Hoxhi” funksionimi i Kaldajës ka qenë me probleme dhe ka sjellë ankesa të prindërve.
Sasia e lëndës djegëse të parashikuar të furnizohet është 35432 litra, megjithatë nuk është e qartë nëse kjo mjafton për gjithë dimrin, apo bashkia do të zhvillojë ndonjë tender tjetër për këtë qëllim.
Ndërsa për mjetet e bashkisë është planifikuar të blihen 157568 litra naftë dhe 6456 litra benzinë. Sipas marrëveshjes që ka bërë Golemi me Gegën, këto shifra janë paraprake dhe mund të ndryshojnë në varësi të çmimit. E vetmja gjë fikse në këtë tender është fitimi i Gegës.
Problemet e Gegës me ligjin
Kujtojmë se Paulin Gega në gush 2019 u shpall në kërkim për veprat penale “Fshehja e të ardhurave” , “Ndryshimi në aparatet matëse” dhe “Pastrimi i produkteve të veprës penale”.
Policia ka ushtruar kontroll në datën 07.08.2019. Nga kontrolli tatimor janë gjetur pompa, të cilat në shkelje të ligjit, funksiononin në regjim manual .
Për këtë arsye i është kryer bllokimi i tregtimit të karburantit nga ky subjekt. Menjëherë pas bllokimit, u kryen hetime intensive që çuan në konkluzionin se administratori i kompanisë, shtetasi Paulin Gega, përmes subjektit “Gen Klaudis Sha” që njihet me emrin tregtar “Gega Oil”, ka kryer evazion fiskal në përmasa të konsiderueshme.
Pas veprimeve të saj hetimore, Policia e Shtetit i referoi në Prokurorinë e Rrethit Gjyqësor Tiranë, e cila xori një urdhër ndalimi më 9 gusht 2019. I njëjti person, ishte proçeduar katër vjet më parë (2015) nga Drejtoria e Policisë Shkodër, për veprën penale fshehje e të ardhurave.
Pasi i rregulloi “letrat” me qeverinë, oligarku Gega vazhdoi të përfitojë tenderat publikë në bashkëpunim me zyrtarët që e favorizojnë.
Brenda pesë vjetëve kjo kompani ka marrë 94 kontrata për blerje karburantesh nga institucionet shtetërore, shumica e të cilave me shkelje gjatë prokurimit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post