Vrasja në 2011-ën, vetëdorëzohet në Kapshticë i shpalluri në kërkim (Emri)

Policia ka arrestuar ditën e stome në pikën kufitare të Kapshticës një 39-vjeçar të shpallur në kërkim.

Sipas policisë, 39-vjeçari Edison Demiri është vetëdorëzuar në kufi, pasi ndaj tij ishte lëshuar urdhër-arresti, pasi është dënuar me 6 vjet burgim, nga të cilat i kanë mbetur për të vuajtur 4 vjet, 11 muaj e 18 ditë burgim, për veprën penale “Plagosja e rëndë me dashje, me pasojë vdekjen”, kryer në bashkëpunim.

“Drejtoria Vendore e Policisë Korçë ekzekutoi vendimin e Prokurorisë, për ndalimin e shtetasit në kërkim Edison Demiri, 39 vjeç, banues në fshatin Pojan, Maliq, i cili u vetëdorëzua në hyrje të Republikës së Shqipërisë, në stacionin e Policisë Kufitare Kapshticë. Gjykata e Apelit Korçë, me vendimin e datës 14.11.2023, e ka dënuar këtë shtetas, me 6 vjet burgim, nga të cilat i kanë mbetur për të vuajtur 4 vjet, 11 muaj e 18 ditë burgim, për veprën penale ‘Plagosja e rëndë me dashje, me pasojë vdekjen’, kryer në bashkëpunim”, njoftoi policia.

“Më datë 25.07.2011, në fshatin Pojan, Maliq, ky shtetas, në bashkëpunim me një shtetas tjetër, për motive të dobëta, ka plagosur me pasojë vdekjen, shtetasin A. Z., 78 vjeç, si dhe ka dëmtuar lehtë djalin e tij.  Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë”, shtuan të njëjtat burime.