Në kërkim për vrasje, ekstradohet nga Britania i riu (Emri)

Një 34-vjeçar i kërkuar për vrasje, është ekstraduar nga Britania drejt Shqipërisë.

Bëhet fjalë për Donald Hoxhën, i cili akuzohet se në datën 22.07.2009, në qytetin e Elbasanit, në bashkëpunim me shtetasit Armand Llakaj dhe Marjus Tafaj, kanë vrarë me arme zjarri policin Roland Rexhepin.

“U ekstradua në Shqipëri nga Mbretëria e Bashkuar, shtetasi D. H., 34 vjeç. Gjykata e Elbasanit, me vendimin e datës 21.01.2024, i ka caktuar masën e sigurisë ”Arrest në burg”, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”, pasi në vitin 2009, në Elbasan, në bashkëpunim me 2 shtetas të tjerë, dyshohet se ka vrarë shtetasin R. R.”, raportoi policia.

Vrasja

Sipas hetimeve: Ngjarja ndodhi më 29 korrik 2009 në lagjen Vullnetari në Elbasan, ku ish-punonjësi i antidrogës në Drejtorinë e Policisë Elbasan, mbeti i vrarë pas të shtënave me armë. Rexhepi u ekzekutua pasi doli nga pallati i tij, duke ju drejtuar garazhit për të marrë makinën.

Në këtë moment, i është afruar me motor njëri nga autorët e krimit, Armando Llakaj, i cili ka hapur zjarr në drejtim të Rexhepit duke e lënë të vdekur në vend. Për këtë ngjarje që dyshohet se erdhi si rezulat i përplasjes mes dy grupeve në Elbasan, dy prokurorët e Elbasanit, Milan Laskaj dhe Ritvan Suka, mundën të sigurojnë prova dhe arrestojnë Marjus Tafa dhe Armando Llakaj. Më vonë, të dy u dënuan me 24 dhe 23 vite burgim.