Korrupsion në zgjedhje, SPAK dërgon për gjykim babain e kandidates për këshilltare

Prokuroria e Posaçme njofton se ka paraqitur në GJKKO kërkesën për gjykim në ngarkim të të pandehurit Agim Loci, akuzuar për kryerjen e veprës penale “Korrupsion aktiv në zgjedhje”.

“Nga hetimi i këtij procedimi penal ka rezultuar se, i pandehuri Agim Loci, është angazhuar në fushatën e zgjedhjeve vendore të datës 14 maj, të vitit 2023, për bashkinë Vorë, ku shtetësja A.L., e bija e të pandehurit Agim Loci, ishte në listën e kandidatëve për Këshillin Bashkiak, si pjesë e një prej koalicioneve pjesëmarrëse në zgjedhje”, njofton SPAK.

Sipas hetimeve, i pandehuri Agim Loci i ka ofruar shtetasit A.K. shumën monetare në vlerën  prej 10 000 lekësh, për të ndikuar në vullnetin e tij, në mënyrë që të votojë një subjekt të caktuar politik në zgjedhjet për organet e qeverisjes vendore të 14 majit në Vorë.