Nën masa të rrepta sigurie në Gjykatën e Vlorës u zhvillua këtë të shtunë seanca për Sokol Sinamatin i njohur me nofkën “Buzëderri”.
Forcat e Ndërhyrjes së Shpejtë dhe ato Shqiponja, mbajtën të rrethuar gjykatën përgjatë procesi që vendosi burg me afat 40 ditor për ish anëtarin e bandës së Gaxhait, për llogari të Italisë.
Drejtësia e vendit fqinj e ka dënuar në mungesë Sinomatin me 12 vjet e 5 muaj burg për pjesëmarrje në organizatë kriminale dhe trafik ilegal të klandestinëve.
Vendimi me afat u caktua për mbërritjen e dokumentacionit për ekstradimin e Sinomatit në drejtim të Italisë.
Sokol Sinomati u arrestua sapo hyri në Vlorë më 24 prill vetëm pak orë pasi kishte dalë nga qelia e burgut të Fushë-Krujës si një ndër përfituesit e Amnistisë.
Nuk dihet pse vendimi i drejtësisë italiane nuk është ekzekutuar gjatë kohës që Sinomati ndodhej pas hekurave por u prit lirimi i tij, për t’u vënë sërish në pranga.
Sokol Sinomati ishte ekstraduar nga Belgjika në fund të vitit 2022, ku ishte arrestuar për trafik droge, ndërsa në Shqipëri akuzohej për një ngjarje të vitit 2002 në zonën e Skelës në Vlorë , ku i vrarë mbeti Elton Tato dhe u plagos Robert Boraku.
Djali i tij, Gëzim Sinomati, u ekzekutua me snajper në janar të këtij viti në Vlorë, atentat ende i pazbardhur.
Discussion about this post