Tenderi i bërë nga Posta Shqiptare në datën 20 tetor të këtij viti, loti i dytë për “ruajtjen së objekteve dhe personelit me roje të kategorisë 1.3.A, Qarku Tiranë, Qarku Durrës, Qarku Elbasan”, ka futur në konflikt Safet Gjicin dhe Ervin Bushatin, i cili është drejtor i Përgjithshëm i Postës Shqiptare.
Ky tender, me numër reference REF-03302-08-19-2021, ka fondin limit prej 46.076.615 lekë të reja ose rreth 460 milionë lekëve të vjetra. Sipas Open Data, kjo procedurë tashmë është anuluar, me arsyen se konstatohet se dokumentet e tenderit përmbajnë gabime ose mangësi të rëndësishme. Ky anulim, siç duket ka hapur një hatërmbetje, pasi kompania e kryetarit të Bashkisë së Kukësit, Safet Gjicit, e cila tashmë zotërohet nga vëllai i tij Lavdrim Gjicit, “Eurogjici Security” Sh.p.k ka marrë pjesë në garën e këtij tenderi dhe nuk bie dakord me anulimin e procedurës, duke iu drejtuar me një ankesë Autoritetit Kontraktor dhe Komisionit të Prokurimit Publik.
Në ankesën e “Eurogjici Security” Sh.p.k, thuhet se arsyeja e anulimit tregon se kemi të bëjmë me një vendim konfuz, të paargumentuar dhe të paligjshëm, i cili dëmton drejtpërdrejtë interesat ekonomike të kësaj shoqërie dhe shpërdorim të detyrës nga ana e Postës Shqiptare.
Në argumentimin e çështjes, kompania e Gjicit kërkon që të anulohet vendimi për anulimin e tenderit, të bëj saktësimet e nevojshme, ose në të kundërt do t’i drejtohet SPAK-ut. Komisioneri i Prokurimit Publik, e ka marrë parasysh ankimimin e Gjicit, duke i kërkuar Postës Shqiptare dhe Ervin Bushatit që të bëj modifikimin e nevojshme dhe të informojë brenda 10 ditësh KPP.
Siç duket Safet Gjici dhe Ervin Bushati, të cilët janë dhe miq socialist, kanë prishur pazaret duke bërë që këtë konflikt ta zgjidhin pse jo dhe në SPAK.
Gijotina.com
Discussion about this post