6 Maji në Shkodër quhet “Dita e Luleve”, pasi ardhja e pranverës festohet me lule, këngë e festivale.
Por ky 6 Maj i ka gjetur të tronditur shkodranët pasi një nënë dhe tre fëmijët e saj dyshohet se janë mbytur në lumin Buna, aty ku ditën e djeshme u gjet trupi i pajetë i vajzës së saj 9-vjeçare, ndërsa sot u gjet edhe trupi i vajzës së dytë.
Katër pjesëtarë të një familje me banim në qytetin e Shkodrës; nëna 39-vjeçare Alma Arrazi bashkë dhe tre fëmijët e saj të moshës 9, 8 dhe 3 vjeç, dyshohet se janë vetëmbytur në ujrat e Lumit Buna, njoftoi policia një ditë më parë. Sipas bluve, “hetimet e thelluara kanë zbardhur një rast të dhunës në familje, që ka shkaktuar vetëvrasje”.
Mesditën e sotme qytetarët shkodranë kanë hedhur lule në lumin Buna pasi festa e planifikuar për ‘Ditën e Luleve’ është kthyer në tragjedi e dhimbje.
Kërkimet për gjetjen e nënës Alma Arrazi dhe dy fëmijëve të saj vijojnë pandërprerje, madje janë zgjeruar edhe në Mal të Zi. Ka dyshime se e reja për shkak të dhunës dhe problemeve që kishte me bashkëshortin ka ndërmarrë aktin e rëndë duke u hedhur nga ura e lumit Buna.
Për herë të fundit ajo dhe fëmijët e saj janë parë në një lokal të kësaj zone, por nuk dihet çfarë ka ndodhur më pas. Policia ka sekuestruar pamjet e kamerave të sigurisë nga ambientetet përreth për të zbuluar lëvizjet e fundit të tyre.
Nga ana tjetër, policia ka arrestuar kryefamiljarin Erdgys Arrazi pasi akuzohet për dhunë ndaj bashkëshortes dhe 3 fëmijëve, si dhe për shkaktim të vetëvrasjes së vajzës së tij 9-vjeçare.
Discussion about this post