Gjatë fjalës së mbajtur në tubimin e përnatshëm tek rruga e ‘Shpresës’, lideri i opozitës, Sali Berisha e akuzoi Edi Ramën se vizita e tij në Greqi është një provokacion.
Berisha, para qytetarëve ka përmendur edhe një fjalë të urtë shqiptare se, ‘kush shkon pa ftuar e gjen pa shtruar’, duke i kujtuar Ramës se nuk është i mirëpritur në Greqi.
“Thashë dhe njëherë nuk do merresha me takimin me diasporën, mallin e pashuar të shqiptarëve për të, por nuk kam si të mos merrem kur ky takim bëhet në një moment elektoral dhe përbën një ndërhyrje flagrante në fushatë elektorale të një vendi i cili pavarësisht se kush ka qenë në pushtet, ka rritur në mënyrën më progresive standardet e trajtimit të emigracionit shqiptar në atë vend.
Vetëm një njeri pa mend, vetëm një njeri që nuk gjen interes tjetër përveç interesit të tij personal, niset në një vizitë të tillë.
Atyre shqiptarëve, do të më falin, por të paktën nga mendja, që e marrin këtë si një karshillëk që po i bën Greqisë Edi Rama me takimin, u them se u ka mbetur koha tek Enver Hoxha.
Se gjatë këtyre 30 viteve, në shtetin fqinj kanë gjetur strehë, kanë gjetur punë, kanë ndërtuar familje, ndoshta rreth 1 milion shqiptarë.
Miqtë e mi, ka edhe arsye të tjera. I fundit njeri që mund të imagjinonte të takonte diasporën është armiku i diasporës dhe kombit shqiptar, Edi Rama.
Por ne kemi një shprehje të hershme sa vetë mikpritja jonë: kush shkon pa ftuar, e gjen pa shtruar.
Në mënyrë të përsëritur, autoritetet zyrtare greke kanë deklaruar se Edi Rama vjen i paftuar.
Natyrisht Greqia është djepi i demokracisë dhe nuk imagjinon të ndalojë tubimet apo takimet.
Por, tradita shqiptare e kërkon të mbash mend këtë parim të mikpritjes sonë.
Nuk shkohet pa ftuar, aq më tepër kur je njoftuar se je i paftuar.”, tha ndër të tjera Berisha.
Discussion about this post