Dinamo vendos në vështirësi Vllazninë, pjesa e parë mbyllet pa gola

Dinamo dhe Vllaznia kanë hapur sonte javën e 14-të të Kategorisë Superiore, teksa pjesa e parë është mbyllur me protat të paprekura.

Të besuarit e Brdariç janë gjendur në vështirësi 45 minutat e para, pasi blutë kanë pasur një sërë rastesh për shënim.

Që në minutën e tretë, Bardhi e nisi vrullshëm për Dinamon, por gjuajtja e tij diagonale ishte e gabuar dhe përfundoi jashtë. Demiri humbi një mundësi të artë në të 12-ën, kur gjuajtja e tij përfundoi mbi traversë.

Në minutën e 25-të, një pasim i gabuar i Imamit për pak sa nuk i dhuroi golin Vllaznisë, por ishte Simoni që me daljen e tij shpëtoi portën.

Katër minuta më vonë, Bardhi pason për Mihanën në qendër, por Zogoviç u tregua i vëmendshëm dhe nuk e lejoi golin. Bardhi, i cili nuk ka luajtur shpesh titullar, duket se ka pritur momentin e tij për të shpërthyer dhe po e tregon në pjesën e parë ndaj Vllaznisë.

Siç duket, ndryshimet e bëra nga Shkëmbi për këtë ndeshje kanë ndikuar për mirë te Dinamo dhe mbetet për t’u parë nëse do të vazhojë me të njëjtin ritëm edhe në pjesën e dytë.