Laboratorët Smart që parashikohet të vendosen në disa shkolla të vendit po vjelin para me thasë nga disa institucione dhe prokurohen nga mjeshtri i tenderave Blendi Gonxhja. Ky i fundit, pasi drejtoi DPSHTRR, është bërë ministër i Ekonomisë dhe ka në varësi organizmin e sapokrijuar Operatori i Blerjeve të Përqendruara SHA.
Dhe sapo mbërriti në ministrinë e re, Gonxhja hodhi në dorë shoqërinë e transferuar nga Ministria e Brendshme. Administratore e OBP është Arlinda Pogaj, e cila më parë ka mbajtur postin e juristes në Drejtorinë e Përgjithshme të Shërbimeve të Transportit Rrugor. Ndërsa në Këshillin Mbikëqyrës janë emëruar anëtarë që, po ashtu vijnë nga DPSHTRR.
Prandaj laboratorët SMART nuk mund t’i shpëtonin vëmendjes së ministrit Gonxhja. Bëhet fjalë për prokurimin me Nr. REF99884-04-02-2024, me objekt: “Blerje pajisje mobilimi për arredimin e klasave SmartLab për Ministrinë e Arsimit dhe Sportit”, me fond limit 84,394,508 lekë të reja pa TVSH. Tenderi ishte parashikuar për t’u zhvilluar më datë 3 maj 2024, por procedurat kanë ngecur për shkak të një denoncimi në KPP.
Kjo ankesë ishte bërë menjëherë pasi tenderi ishte publikuar në APP. Nga firma “Klame” SHPK’ pretendohet se janë vendosur kritere penalizuese për operatorët që duan të marrin pjesë në garë, duke ngritur dyshimin se tenderi ishte hartuar për një kompani të posaçme.
Pas shqyrtimit të kërkesës më darë 9 Maj 2024, Komisioni vendosi që të pranojë ankesën e “Klame” shpk, ndërsa i kërkoi Operatorit të varur nga Gonxhja të ndryshojë kriteret ne dokumentet dhe të raportojë ndryshimet e bëra në APP dhe KPP.
Nga ana tjetër, pa humbur kohë, më 16 maj 2024, OBP njofton se ka zbatuar vendimin e dhënë nga KPP të datës 9 maj 2024. Por në fakt, pas rishqyrtimeve të bëra, Komisioni zbulon se vartësit e Gonxhja nuk e kanë zbatuar vendimin, pasi nuk është bërë asnjë lloj modifikimi në dokumente.
Pas kësaj, KPP ka vendosur që Operatori i Blerjeve të Përqendruara të mos vazhdojë me procedurat dhe anulon tenderin.
Fondet e derdhura për SmartLab
Sakaq sikur e cekëm më lartë këto janë fonde që i shtohen dhe vetëm i shtohen këtij projekti për laboratorët Smart, pasi më herët në kemi denoncuar prokurimet e tjetra abuzive.
Kujtojmë se më datë 26 mars 2024, është hapur gara për tenderin me objekt ‘Implementimi i laboratorëve SMART- për MAS”, me fond limit 388 milionë lekë. Sipas të dhënave, fituese është firma AlbaScan në pronësi të Elton Jorgjisit .
Ndërsa më herët, në 29 janar 2024, AKSHI kishte kryer një tender me objekt “Implementimi i laboratorëve SMART- për Ministrinë e Arsimit dhe Shkencës”, ku fondi limit ishte 16 miliardë lekë. Edhe kjo faturë shkoi në llogari të shoqërisë “Albscan”, me propozimin 11 miliardë lekë.
E qartë që zoti Gonxhja është pjesë e administrimit të këtij cikli tenderash të korruptuar që po përpin miliarda lekë në emër të dijes së fëmijëve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post