Zbulohen detaje të reja në lidhje me operacionin e Trafiqeve të Tiranës ku u arrestuan katër shqiptarë të Kosovës. Burime nga grupi hetimor bëjnë me dije se katër të rinjtë i merrnin në Serbi armët dhe më pas i trafikonin në Shqipëri me qëllim për ti shitur në grupe kriminale.
Ata dyshohet se bashkëpunonin me persona serbë, që këta të fundit armët i siguronin në Çeki, të prodhuara atje. Të njëjtat burime shtojnë se Blerim dhe Muhamed Krasniqi, Benjami Shala dhe Edonis Thaçi kanë trafikuar edhe herë të tjera pistoleta dhe municione luftarake në vendin tonë. Madje përmes zbërthimit të celularëve të tyre janë gjetur komunikime me persona të tjerë, që dyshohet se janë klientë të tyre për blerjen e armëve të zjarrit.
Sektori i Trafiqeve pranë Policisë së Tiranës ka kryer kontrolle banesash në disa qytete, por armët nuk janë gjetur, çfarë shton dyshimet se një pjesë e tyre janë dërguar në Greqi për llogari të klaneve kriminale në vendin fqinj.
Blerësit e këtyre armëve, sipas burimeve pranë policisë, rezultojnë të jenë me precedent penal të mëparshëm në fushën e drogës dhe krimeve të tjera të rënda.
Grupi kriminal nga Kosova dyshohet se prej 1 viti trafikonin armë zjarri nga Kosova drejt Shqipërisë përmes linjës së autobusëve në pronësi të Edonis Thaçit. Trafiqet e Tiranës prej 7 muajsh i kishin në përgjim. Më herët ky grup kriminal ka sjellë armë në Shqipëri, kryesisht pistoleta, në Tiranë, Vlorë, Sarandë dhe Korçë
Discussion about this post