Sali Berisha u bëri thirrje këtë të shtunë qytetarëve që të dalin në protesta, sepse sipas tij, “vetëm mosbindja civile e vazhdueshme dhe e pamposhtur është rruga për realizimin e qëllimeve tona madhore”.
Gjatë fjalës së tij, në tubimin e përnatshëm poshtë banesës së tij, kryedemokrati Sali Berisha deklaroi se Edi Rama ka zgjedhur në luftën kundër opozitës “mercenarë dhe kriminelë të llojit Damani, Kraja, Millonai e kompani”.
Ai akuzoi drejtuesin e SPAK, Altin Dumani se është duke amnistuar krimin elektoral. “Dumani censuroi çdo bisedë për krimin elektoral në dosje! Me kallp-mandatet e tij i eksportoi kriminelët drejt Europës”, theksoi Berisha gjatë fjalës së tij.
Berisha ka akuzuar Altin Dumanin edhe për dosjen ndaj Olsi Ramës. Ai tha se këtë procedim penal “ja ka lënë në dorë prokurorit Alfred Shehu, i cili në vitin 2021 pak ditë para zgjedhjeve parlamentare, gënjeu në një konferencë për mediat, se në makinën e Mahmet Grecës nuk kishte asnjë material të paligjshëm, që rezultoi mashtrim nga ana e prokurorit”.
Për hetimin e nisur ndaj Olsi Ramës në SPAK pas denoncimit të Gazment Bardhit, kryetari i Partisë Demokratike i ka bërë thirrje KE-së, FBI-së dhe prokurorisë gjermane të dërgojnë përfaqësues për të monitoruar.
Kryetari i PD-së u ndal dhe te protestat e përjavshme që zhvillohen para bashkisë së Tiranës. Ai ka bërë thirrje qytetarëve që të martën të mblidhen në protestë tek bashkia “për të nxjerrë për zverku Erion Veliajn dhe për ta varur në shtyllën e turpit të historisë”.
Discussion about this post