Kryebashkiaku i San Franciskos shpalli gjendjen e jashtëzakonshme të premten në një lagje të rrënuar nga krimi dhe vdekjet nga mbidoza e drogës. Kryebashkiaku London Breed prezantoi Planin e saj të Ndërhyrjes Emergjente për komunitetin e Tenderloin me synimin për të eliminuar barrierat burokratike në mënyrë që njerëzit me çështje të abuzimit me substanca të mund të marrin këshillim dhe shërbime shëndetësore të menjëhershme.
Plani përfshin gjithashtu një sistem për të shpërndarë në mënyrë të sigurt Narcan, një spraj hundor që mund t’i tërheqë njerëzit nga mbidoza e opioideve. “Nuk ka të bëjë vetëm me të pastrehët, ka të bëjë me varësinë,” tha Breed gjatë konferencës për shtyp të së premtes. “Jemi në krizë. Shumë njerëz po vdesin në qytet dhe shumë njerëz janë shpërndarë nëpër rrugët tona.
Deklarata emergjente e kryetarit të bashkisë duhet të miratohet nga Bordi Mbikëqyrës brenda një jave dhe do të përfundojë brenda 90 ditëve. Zona Tenderloin po sheh të paktën dy vdekje nga mbidoza në ditë, kryesisht nga droga ‘fentanyl’, e cila është pjesë e arsyes pse deklarimi i urgjencës ishte i nevojshëm për të shkurtuar burokracinë, tha Breed.
Sipas planit, kodet e zonave dhe planifikimit do të hiqen në mënyrë që ata në nevojë të mund të marrin menjëherë shërbime shëndetësore. Plani përfshin gjithashtu hapjen e një qendre ku njerëzit mund të shkojnë për të marrë trajtim të abuzimit me substanca, këshillim dhe kujdes mjekësor. Zyrtarët e qytetit tashmë janë takuar me aktorët e komunitetit për të ndihmuar në identifikimin se ku dhe cilat shërbime janë më të nevojshme në zonë.
Discussion about this post