Pasi i zgjidhi hallet e të pastrehëve nga tërmeti, mungesës së ujit të pijshëm, mbeturinave kudo dhe rrugëve të amortizuara, tashmë që shoi “zhurmën” e inceneratorit, kryebashkiaku i Tiranës, Erion Veliaj ka vendosur konkurrojë Milanon.
Kujtojmë së në fund të viti 2023, Tirana u shpall “Kryeqyteti Mesdhetar i Kulturës dhe Dialogut 2025”. Mes entuziazmit atë ditë Veliaj u shpreh “Tirana jo vetëm do të shkëlqejë, siç ka shkëlqyer gjithë këto kohë, por do të ketë aktivitetin kulturor më të pasur në Mesdhe. I gjithë Mesdheu do të jetë në Tiranë për kulturën që ofron Tirana, kryeqyteti ynë. Forca dhe gëzuar. Urime të gjithëve”.
Por prisni pak, se Veliaj e ka kapur kulturën në të gjitha dimensionet. Dhe i ka nisur punimet që tani që jemi në pjesën e parë të vitit 2024. Me shpenzime të mëdha sepse synon që të konkurrojë Milanon në fushën e modës!
Të gjithë e dimë që pasarelat e modës mbahen në Milano, Paris, Londër dhe New Work, ku shkojnë nga gjithë bota ata që njihen për stilin dhe modën e veshjeve.
Epo Lali Eri do t’i sjellë në Tiranë dhe parashikohet që “Gucci dhe “LOUIS VUITTON” t’i bëjnë karshillëk Tregut Çam.
Këtë projekt Veliaj ia ka besuar kompanisë së modës “Joni Peci Store”. Më datë 10 maj 2024, Veliaj i ka dhënë Jonni Peçit tenderin “Projekt Kulturor, Tirana Kryeqyteti i Modës 2024”. Pra “Joni Peci Store” do të përgatisë pasarelën e Modës në kryeqytet dhe Lali Eri do t’i japë 50 milionë lekë nga taksat e qytetarëve.
Kontrata nuk është bërë ende publike, ndërsa tenderi është publikuar nga Open Data Albania. Theksojmë se ky është vetëm fillimi, pasi në 2025 me siguri kryetari Veliaj do të konkurrojë çdo pasarelë mode në botë.
Prej kohësh u kuptua se Tirana dhe Kali Eri kishin nevojë për famë ndërkombëtare dhe po bëhet realitet.
Në ceremoninë e prezantimit të gjetjeve të Monitorimit 2017, organizuar nga INFOCIP dhe mbështetur nga “Olof Palme Center” dhe Qeveria Suedeze, kryebashkiaku Erion Veliaj mori çmimin si institucioni më transparent ndaj qytetarëve. Komisioni Europian i dha kryetarit të Bashkisë së Tiranës, Erion Veliaj, çmimin “Kryebashkiaku më miqësor me komunitetin rom”. Pazari i tek Avni Rustemi mori çmimin “Projekti rinovues më i mirë i vitit” për Europën.
Po ashtu, kryebashkiaku Veliaj është nderuar në Samitin e Qyteteve në Ankara me çmimin Tirana qyteti më inovator.
Kujtojmë se në vitin 2023, Tirana ishte ‘Kryeqyteti i Rinisë dhe Sporteve’ dhe e vetmja gjë që bënte Lali Eri ishin disa aktivitete mes gjimnazeve në Tiranë.
Aktualisht, Erion Veliaj është president i qyteteve të Ballkanit i zgjedhur nga iniciativa B40 Network Presidency. Pritet që çmimi i ardhshëm që do të marrë kryetari Veliaj t’i dorëzohet nga Joni Peci për “kontributin në njohjen e Tiranës si Kryeqytet të Modës”.
Nuk e dimë se si e vlerëson Honi Peci veshjen e kryebashkiakut, por ka shprehur dikur admirim për stilin e kryeministrit Rama. “Unë do i jepja ndoshta notën 9. Nuk i përkas asnjë force politike, dhe po them mendimin tim në lidhje me të. Kur unë kam bërë modë dikur, më tregonin gishtin duke më vendosur epitete të ndryshme, ndaj nuk më pëlqen të komentoj për veshjen një personi tjetër. Por dua të them që kryeministri Edi Rama shpesh herë është i veshur mjaft këndshëm”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post