Gjekmarkaj: Qeveria ka rënë moralisht, ministrat bëjnë paradë në SPAK

Nënkryetari i Partisë Demokratike të rithemelimit si dhe i Kuvendit, Agron Gjekmarkaj ka komentuar zhvillimet e fundit politike në PD dhe në vend.

Gjekmarkaj tha se ministrat e Ramës janë duke bërë paradë në SPAK, ndërsa sipas tij kjo qeveri ka rënë moralisht.

Ai shton se vendi është duke rënë po ashtu në diktaturën absolute të korrupsionit.

“Seancat plenare prej muajsh janë në anomali. Lideri i opozitës është arrestuar edhe pa hetim. Kryeministri e ka kuptuar se hallka e dobët e tij është korrupsioni. Ministrat bëjnë paradë në SPAK dhe mund të themi se kjo qeveri ka rënë moralisht. Antikorrupsioni është slogan i qeverisë e nuk ka si të jetë Komision. Ne po biem në diktaturën absolute të korrupsionit.

Mazhoranca është e venitur dhe e zbehtë. Në lidhje me Komisionin për Antikorrupsionin, mund të them se ne nuk lajmë fytyrën e pisët të qeverisë. Unë besoj se PD e ka nisur rrugëtimin e NATO-s, ka nisur rrugën europiane dhe do jetë ajo që do të mbyllë procesin e integrimit europian. PD po vepron ndryshe.

Në lidhje me z Berisha, fakti që shumica e demokratëve ndoqi atë, tregon se Sali Berisha është një lider i padiskutueshëm për Partinë Demokratike. PD është i vetmi institucion që mund të ndalë hovin e gabuar të qeverisë.

Partia Demokratike nuk është ndaluar që të diskutojë çështjen nëse Berisha do jetë kandidati për kryeministër. Nuk jemi ndalur ende për të gjetur formulën sesi do të përballemi me kundërshtarin. Mendoj se PD do të marrë vendimin e duhur për këtë çështje. Nuk mund të jem fallxhor, nuk e kemi diskutuar këtë gjë në parti”, u shpreh ai.