Plagosje me thikë në Tiranë

Një plagosje me thikë ka ndodhur këtë pasdite në Farkë të Tiranës. Sipas policisë, një 34-vjeçar është goditur me thikë nga një 40-vjeçar. Konflikti mes të dyve, sipas bluve, ka ndodhur “për motive të dobëta”.

Autori është arrestuar. “Nga veprimet hetimore dyshohet se 40-vjeçari, gjatë një konflikti për motive të dobëta, ka plagosur me mjet prerës shtetasin H. Sh., 34 vjeç, i cili ndodhet në spital, nën kujdesin e mjekëve”, njoftoi policia lidhur me ngjarjen, për të cilën saktëson se ka marrë njoftim rreth orës 18:00.

Autori i dyshuar B.B., 40 vjeç, banues në Tiranë, u arrestua për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.