Një person rezulton i zhdukur në Dhërmi. Sipas policisë, dyshohet se recepsionisti i një hoteli i identifikuar si Erlado Nevruzi, 31 vjeç, banues në Tiranë, është ekzekutuar me armë zjarri. Blutë nuk e kanë gjetur ende trupin e pajetë, megjithatë dyshojnë se i riu është qëlluar me armë zjarri nga një person, i cili është arratisur më pas drejt Greqisë. Autori i dyshuar është identifikuar si Gerald Shehu, 43 vjeç.
Burime zyrtarë nga blutë bëjnë me dije se janë njoftuar këtë të enjte nga pronarët e hotelit ku punonte i riu si recepsionist, se kishin humbur kontaktet me punonjësin.
“Me marrjen e njoftimit, Drejtoria Vendore e Policisë Vlorë dhe Komisariati i Policisë Himarë kanë ngritur një grup hetimor, në drejtimin e Prokurorisë së Juridiksionit të Përgjithshëm Vlorë. Shërbimet e Policisë dhe grupi hetimor kanë shkuar në hotel dhe kanë kryer një sërë veprimesh hetimore. Nga veprimet hetimore dyshohet se shtetasi E.N. (Erlado Nevruzi) është qëlluar me armë zjarri, rreth orës 00:30, nga shtetasi G.Sh. (Gerald Shehu), 43 vjeç, lindur në Tepelenë dhe banues në Angli”, njoftoi policia.
Nga veprimet e tjera hetimore, shtuan të njëjtat burime, rezulton se pas ngjarjes, Gerald Shehu është larguar drejt Greqisë.
“Janë administruar në cilësinë e provës materiale, prova ligjore, si dhe janë shoqëruar deri në këto momente, për t’u pyetur në lidhje me këtë ngjarje, 29 shtetas. Nga tërësia e veprimeve të deritanishme dyshohet se kemi të bëjmë me një ngjarje të rëndë kriminale. Grupi hetimor, në drejtimin e Prokurorisë, vijon punën intensivisht për gjetjen e shtetasit E.N. (Erlado Nevruzi), si dhe për zbardhjen e rrethanave dhe dokumentimin e plotë ligjor të rastit”, thuhet më tej në njoftim paraprak të bluve lidhur me rastin.
Discussion about this post