Qindra hektarë tokë kanë mbetur të dëmtuara në zonën e Dumresë për shkak të shtimit të karkalecave. Fermerët shprehen se kanë pësuar dëmtime të mëdha në prodhimet e tyre, ndërsa ngrenë shqetësimin se nga institucionet nuk është kryer spërkatja. Askush nuk i ka kompensuar për këto dëme, e as nuk kanë marrë masa për t’i parandaluar.
Shtimi i karkalecave në zonën e Dumresë ka dëmtuar qindra hektarë tokë. Sipas banorëve, kjo është një situatë e përsëritur prej më tepër se dy vitesh, por askush nuk ka marrë masa për të kryer spërkatjen e zonës, ndonëse sipas njoftimit spërkatja do të duhet të kishte nisur ditën e hënë.
Të shumta janë prodhimet e dëmtuara nga shtimi i karkalecit këtë periudhë, por më të prekura janë vreshtat, jonxha e tërfili. Më shumë se gjysma e prodhimit është dëmtuar. Për këtë prodhim të humbur askush nuk i kompenson fermerët e nuk ndërmerret asnjë veprim për ta parandaluar. Dezinfektimet sporadike të vetë fermerëve rezultojnë pa sukses, pasi karkaleci lëviz e sërish rikthehet.
E njëjta situatë paraqitet edhe në shumë fshatra të tjerë të qarkut të Elbasanit, por vatra më e madhe vijon të mbetet zona e Dumresë./Syri
Discussion about this post