Boçi: Basha të bëjë “mea culpa”

Nënkryetari i PD Luçiano Boçi tha në MCN Live se procesi i bashkimit në PD duhet të vazhdojë, duke përfshirë bazën, grupin parlamentar dhe ish-drejtuesit.

Ai vuri në dukje se Basha duhet të bëjë një “mea culpa” për situatën e krijuar për demokratët.

Ndër të tjera Boçi tha që duhet të pushojë gjuha e urrejtjes, dhe bashkimi duhet të tejkalojë egot personale.

“Apeli ynë do jetë i vazhdueshëm, pasi PD është bashkësi aksionesh e faktorëve aktuale dhe historikë. Por këto aksione marrin vlerë kur janë brenda PD. Unë besoj që ky proces bashkimi duhet të vazhdojë. Është një vendim që pushon debatin brenda PD-së. Unë jam iniciator që të kemi kontakte të drejtpërdrejta me ish-drejtues dhe drejtues aktual, përderisa ata janë drejtues të PD. Duhet të pushojë debati për fatet individuale. Është diskutuar midis nesh dhe kemi dalë në vendimmarrje, që procesi i bashkimit duhet të jetë i vazhdueshëm, duhet të përfshijë të gjithë bazën e PD, grupin e PD, dhe ish-drejtuesve të PD. Deri më tani Basha dhe Alibeaj janë vetpërjashtuar. Nuk i pranon më publiku akuzat që Berisha bashkëpunon me Ramën. Basha është krejt i paqartë, bën autogol të vazhdueshëm, është në fazën e vetpërjashtimit.

Nuk ka negocime. Ka pasur edhe deklarata të tjera dhe biseda që z.Çollaku është i atashuar te PD, ky atashim është i gjithë deputetëve. Në statutin e PD është i përcaktuar qartë edhe mendimi ndryshe dhe fraksionet. Unë dua të pushojë mllefi dhe gjuha e urrejtjes. Kjo është e domosdoshme, sepse gjithë ky investim negativist s’na ka shërbyer. Jemi me fat që jemi afër zgjedhjeve. Institkti i luftës me kundërshtarin të bën të harrosh gjithë sherret dhe zënkat. Këtu ka një qëllimësi më të madhe përtej individit. Duhet kapërcyer një moment egon personale. Basha e para duhet të bëjë një ‘mea culpa’ për të gjithë këtë situatë të krijuar për demokratët. Unë jam te bashkimi, krijimi i një partie, fragmentimi i opozitës, nuk përputhet me situatën, sepse jemi në prag të zgjedhjeve”.

Pyetjes se kush do të jetë kryetari i ri i PD, Boçi iu përgjigj:

“Na është bërë edhe herë të tjera kjo pyetje. Z.Berisha ka një mandat dhe mandati i tij përcaktohet nga fati i zgjedhjeve të 2025-ës, e ka thënë dhe e ka deklaruar edhe vet. Në statut ka një pikë që përcakton raportin me mandatin, në raport me rezultatin zgjedhor të PD. Debatet hidhen për konsum”.