Mediat serbe kanë reaguar mbi protestën e thirrur nga ish-kryeministri Sali Berisha kundër vizitës së Aleksandër Vuçiç në Tiranë. “Novisti” shkruan se Berisha ka bashkëpunuar me ish-kryeministrin e Kosovës Ramush Haradinaj për të organizuar këtë protestë.
Sipas tyre, Haradinaj do të sigurojë të paktën 100 shqiptarë nga Kosova që të jenë të pranishëm në protestë.
“Ekstremistët shqiptarë me ndihmën e politikanëve nga Kosova, po përgatisin të hënën dhe të martën protesta kundër presidentit serb Aleksandar Vuçiç, i cili do të jetë në Tiranë në kuadër të nismës “Ballkani i Hapur”. Bashkëbiseduesit tanë të mirë informuar pohojnë se Berisha ka kontaktuar personalisht me Ramush Haradinajn për të siguruar praninë e së paku 100 personave nga Kosova në këtë protestë”, shkruan media serbe.
Gjithashtu, shton se organizatorët e protestës janë ish-sekretari organizativ i PD-së Sait Dollapi, ish-truprojat e Berishës Agron Kuliçaj e Sali Lushaj. “Novosti” shkruan se këtë protestë e ka mbështetur dhe kryeministri i Kosovës Albin Kurti. Kujtojmë që protesta do të nisë në orën 16.00 në selinë blu dhe më pas do të zhvendoset drejt kryeministrisë.
Discussion about this post