Temperatura ekstreme në Kupën e Amerikës, arbitrit i bie të fikët në fushë

Një moment dramatik është regjistruar gjatë ndeshjes së fazës së grupeve në Kupën e Amerikës mes Perusë dhe Kanadasë.

Një ndihmës arbitër u rrëzua më fushë, për shkak të kushteve ekstreme të motit në stadiumin e Kansas City.

Incidenti ndodhi në minutën e 49-të të ndeshjes, kur gjyqtari Humberto Panjoj, i cili kishte qëndruar gjatë gjithë kohës në diell humbi ndjenjat.

Ishte portieri i Kanadasë, Maxime Crepeu, i pari që e vuri re duke iu afruar dhe më pas duke sinjalizuar ndihmën mjekësore.

Personeli mjekësor u përgjigj shpejt dhe arbitri u largua nga fusha duke marrë duartrokitjet e të pranishmëve.

Vapa ekstreme jo vetëm që ka ndikuar në këtë ndeshje, por ka prekur edhe lojtarë të tjerë në turne.

Në fillim të javës, mbrojtësi i Uruguait Ronald Aurajo u desh të largohej nga fusha gjatë fitores 3-1 të ekipit të tij ndaj Panamasë për shkak të çështjeve të ngjashme të lidhura me nxehtësinë.

Aurajo raportoi se ndjehej i trullosur dhe përjetoi një rënie të presionit të gjakut, gjë që i atribuohej dehidrimit.

Ndërsa Copa America 2024 vazhdon, vapa rraskapitëse e verës në qytete të ndryshme të SHBA-së mbetet një faktor i rëndësishëm, duke prekur lojtarët dhe zyrtarët.