Mediat greke kanë hedhur dyshime mbi vendimin e gjykatës së Gjirokastrës që doli në përfundimin se minoritari grek Kostandinos Katsifas, është vetëvrarë.
Mediat fqinje shkruajnë se prokurorja që ka shqyrtuar çështjen ka qenë e përfshirë në një rast të shpërdorimit të detyrës dhe korrupsionit.
Në artikull, thuhet se kjo ngre pikëpyetje pasi propozimi i mëparshëm i kësaj prokurorie ishte kthyer më herët nga gjyqtarja për një hetim të mëtejshëm pasi nuk kishte prova të mjaftueshme për të dalë në përfundimin se Katsifas kishte kryer vetëvrasje.
“Të paqarta mbeten informacionet shtesë që dolën për të pranuar sugjerimin e prokurorit. Raporti i prokurorit nuk është koherent dhe në shumë pjesë të tij është i diskutueshëm dhe kontradiktor. Pretendimin për vetëvrasjen e Katsifas prokurori e mbështet në ekspertizën mjeko ligjore të kryera në Tiranë dhe Gjirokastër me mjekë që nuk u gjetën kurrë dhe nuk kanë foto të vendit të ngjarjes ashtu si duhet të jenë sipas standardeve botërore”, thuhet në artikull.
Më tej, media greke shkruan se për vendimin për vetëvrasjen e Katsifas nuk është marrë parasysh njoftimi zyrtar i RENEA-s për ekzekutimin nga trupat e saj të Kostandino Katsifas.
Zyrtarisht, familja e 35-vjeçarit grek ende nuk është vënë në dijeni për vendimin e Gjykatës së Gjirokastrës. Megjithatë, përjashtimi i pranimit zyrtar të vrasjes nga ana e RENEA-s i hap rrugë ankimimit në Gjykatat Europiane.
Discussion about this post