Rrëmbimi dhe vrasja e biznesmenit të inerteve, Gjykata e Apelit rrëzon kërkesën e fëmijëve të Rruzhdi Hoxhës

Gjykata e Apelit ka rrëzuar kërkesën e fëmijëve të biznesmenit të rrëmbyer e më pas të vrarë, Rruzhdi Hoxha, për ashpërsim të dënimit të autorit.

Gjykata caktoi dënimin me 15 vite burg të autorin Fredi Rrushi. Për shkak të gjykimit të shkurtuar atij i ulet 1/3 e dënimit dhe përfundimisht u vendos 10 vite burg.

Por ky dënim sipas fëmijëve të biznesmenit të ekzekutuar nuk mjafton, ndaj çështja është apeluar. Megjithatë, Gjykata e Apelit ka rrëzuar kërkesën e tyre.

Rruzhdi Hoxha u gjet i ekzekutuar me plumb në kokë në Malin e Dajtit më 6 nëntor të vitit 2021.

Vrasja e Ruzhdi Hoxhës

Në 20 tetor të 2021 biznesmeni 43 vjeçar Ruzhdi Hoxha u raportua nga fëmijët i zhdukur. Dy javë më pas ai u gjend i ekzekutuar me një plumb në kokë në zonën e Qafë Mollës në Dajt i mbuluar me gurë dhe zhavorr.

Zyrtarisht sipas policisë Fredi Rrushi, dy ditë pas denoncimit nga familja Hoxha,  më 26 tetor 2021 u arrestua si person i shpallur në kërkim ndërkombëtar nga autoritetet ligjzbatuese italiane për veprën penale të trafikimit të  narkotikëve. Dyshimet e para ndaj tij u ngritën kur policia zbuloi një parcelë kanabis në zonën e Dajtit.

Aty u kap edhe një roje i cili në dëshminë tij tha se Fredi Rrushi e kishte punësuar të ruante drogën. Nga ana tjetër ajo çfarë kishte deponuar fillimisht Rrushi nuk korrespondonte me provat e policisë. Ai tha se e kishte lënë shokun e tij në Fushë Mëzes, por në kamera ai shfaqet në drejtim të Dajtit. Ndërkohë pak ditë më parë  në komisariatin numër 4 një person denoncoi se ka gjetur në rrugë, pranë Shkollës së Bashkuar, një celular. Nga verifikimet doli se ky aparat ishte i biznesmenit Rruzhdi Hoxha. Ishte telefoni ai që hodhi në dritë mbi ngjarjen dhe çoj pas hekurave Fred  Rrushin.