Presidenti Bajram Begaj i është përgjigjur me shpejtësi kërkesës së kryeministrit Edi Rama për caktimin e datës së zgjedhjeve të reja në Himarë.
Referuar dekretit të kreut të shtetit, zgjedhjet e reja do të mbahen më 4 gusht 2024.
Vendimi i Begajt, ashtu si kërkesa e Ramës, nuk respektojnë afatet e ankimit të Fredi Belerit, kryebashkiakut të zgjedhur të Himarës, mandati i të cilit u konstatua i pavlefshëm më herët gjatë ditës nga kryekomisioneri Ilirjan Celibashi.
Dekreti
Në një njoftim të zyrës së shtypit të Presidencës, thuhet se “sot, Këshilli i Ministrave njoftoi zyrtarisht Presidentin e Republikës për vakancën e krijuar në bashkinë Himarë për shkak të konstatimit të pavlefshmërisë së mandatit të fituar nga z.Dhionisios (Alfred) Petro Beleri dhe kërkoi caktimin e datës së zgjedhjeve, brenda afateve që përcakton Kodi Zgjedhor. Kryetari i zgjedhur i bashkisë Himarë është gjendur nga Komisioni Qendror i Zgjedhjeve në kushtet e pavlefshmërisë së mandatit, për shkak të dënimit me vendim të formës së prerë për veprën penale të ‘korrupsionit aktiv në zgjedhje’, të parashikuar nga neni 328 i Kodit Penal të Republikës së Shqipërisë”,
Më tej në komunikatë sqarohet se vendimi për caktimin e datës së zgjedhjeve të reja erdhi pas një takimi që Presidenti Beqaj pati me kreun e KQZ-së, Celibashi.
“Presidenti i Republikës, Sh.T.Z.Bajram Begaj thirri në konsultë z. Ilirjan Celibashi, Komisioner Shtetëror i Zgjedhjeve për t’u informuar lidhur me kapacitetet dhe gadishmërinë e institucionit menaxhues të zgjedhjeve, për zhvillimin e zgjedhjeve në këtë bashki, brenda kornizës kalendarike të Kodit Zgjedhor. Pas kësaj konsulte, Presidenti i Republikës, Sh.T.Z.Bajram Begaj dekretoi datën 4 gusht 2024 për zhvillimin e zgjedhjeve për kryetar bashkie në bashkinë Himarë, si alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet, rrethanat dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore”, thuhet në njoftimin e Presidencës.
Urgjenca për zgjedhjet e reja
Më herët gjatë ditës, KQZ shpalli pavlefshmërinë e mandatit të Fredi Belerit, duke u bazuar në ligjin e dekriminalizimit. Disa javë më parë, Apeli i GJKKO konfirmoi dënimin me burg për Belerin, për korrupsion në zgjedhje.
Megjithatë, kryekomisioneri Celibashi shqiptoi gjatë seancës se Beleri ka 30 ditë kohë për të ankimuar pranë Komisionit të Ankesave dhe Sanksioneve vendimin dhe Vangjel Dule, në përfundim të seancës paralajmëroi ankim të vendimit teksa deklaroi ndjekjen e çdo hapi ligjor “për të vendosur të drejtën në vend”.
Pas vendimit, kryeministria i adresoi një shkresë KQZ-së përmes së cilës i kërkon ta njoftojë zyrtarisht për vendimin. KQZ përgjigjet shpejt dhe menjëherë më pas, kryeministria i kërkon Presidentit Begaj shpalljen e datës për zgjedhjet e reja në Tiranë.
Ashtu si KQZ, Begaj vepron me urgjencë ndaj kërkesës së kryeqeveritarit Edi Rama, duke mos marrë parasysh afatin ligjor për ankimin e vendimit nga Fredi Belerit – që ende nuk ka marrë formë të prerë.
Lexo edhe:
Rama nuk pret vendimin e KAS, i kërkon Begajt me urgjencë shpalljen e datës së zgjedhjeve në Himarë
Discussion about this post